(ខណ្ឌមានជ័យ)៖ នៅវេលាម៉ោង១១ និង២០នាទីថ្ងៃទី១៧ ខែមីនានេះ ក្រុមគ្រូពេទ្យបង្អែករាជធានីភ្នំពេញ បានចុះទៅយក បុរសអ្នកជំងឺកូវីដ១៩ ម្នាក់ នៅម្តុំផ្សារក្រមួន ស្ថិតក្នុងផ្ទះលេខ៥៥១ ក្រុមទី១៣ ភូមិឫស្សី សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។
លោក សេង វ៉ាន់ថា ចៅរងទី១សង្កាត់ស្ទឹងមានជ័យទី២ បានឲ្យដឹងថា ក្រុមគ្រូពេទ្យបានមកយកបុរសម្នាក់ឈ្មោះ មាស ណេត ភេទប្រុស អាយុ៣៥ឆ្នាំ មុខរបរបម្រើការនៅហាងម៉ូតស្តរ នៅខណ្ឌទួលគោក ហើយស្នាក់នៅក្បែរផ្សារក្រមួនស្ទឹងមានជ័យនេះឯង។
លោកចៅរងសង្កាត់សំណូមពរដល់បងប្អូនប្រជាពលរដ្ឋ ដែលរស់នៅក្បែរទីតាំងផ្ទះលោក មាស ណេត សុំកុំចេញពីផ្ទះបើពុំមានការចាំបាច់។ ពិសេសត្រូវអនុវត្តឲ្យបានខ្ជាប់ខ្ជួននូវវិធានការ៣កុំ និង៣ការពារ និងសុំឲ្យពាក់ម៉ាស លាងដៃដោយសាប៊ូ និងបាញ់អាល់កុលគគ្រប់ៗគ្នា ៕
