(ខេត្តស្ទឹងត្រែង)៖ រថយន្តប្រភេទមួយតោនកន្លះបើកបុកបុកម៉ូតូខណ:កំពុងបើកបរខ្វែងគ្នាបណ្ដើរឱ្យស្ត្រីម្នាក់ និងកុមារីម្នាក់ បានស្លាប់ នៅនឹងកន្លែងកើតហេតុ និងស្ត្រីពីរនាក់ទៀត បាបានរងរបួសធ្ងន់។ហេតុការណ៍នេះបានកើតឡើងកាលពីវេលាម៉ោង ២ រសៀលថ្ងៃទី៤ ខែមករា ឆ្នាំ២០២១នៅត្រង់ផ្លូវបំបែកជាបួន ស្ថិតក្នុងភូមិស្ពានថ្ម សង្កាត់ស្ទឹងត្រែង ក្រុងស្ទឹងត្រែង ។
ប៉ូលិសចរាចរណ៍ក្រុងស្ទឹងត្រែង បានឱ្យដឹងថាជនរងគ្រោះអ្នកបើកបរម៉ូតូ ឈ្មោះ ស្រី ឡៃ អាយុ ៣១ ឆ្នាំ មានលំនៅ នៅភូមិជានុកូល សង្កាត់ស្ទឹងត្រែង ក្រុងស្ទឹងត្រែង និងកុមារីឈ្មោះ ចិត្ត កុចនីម អាយុ៦ឆ្នាំ រស់នៅក្នុងបន្ទុកឪពុកម្ដាយ(ស្លាប់)។ ចំណែកស្ត្រីជាអ្នករួមដំណើរជាមួយ រងរបួសធ្ងន់ ពីរនាក់ គឺឈ្មោះ សួន សុខុម អាយុ ៣១ ឆ្នាំ និងឈ្មោះ រីដា ណេង អាយុ១៧ឆ្នាំ ទាំងពីរនាក់ មានលំនៅ បច្ចុប្បន្ន ភូមិសៀមបូក ឃុំសៀមបូក ស្រុកសៀមបូក ខេត្តស្ទឹងត្រែង។
ប្រភពដដែល បានបញ្ជាក់ថាៈ រថយន្តចំណុះ ១តោនកន្លះ ពណ៌ខៀវ គ្មានស្លាកលេខ មានទិសដៅពីទិសខាងកើត ទៅខាងលិច ដោដោយមានអ្នករួមដំណើរមនុស្សប្រុស០៣នាក់ ។ តៃកុងរថយន្ត មិនស្គាល់អត្តសញ្ញាណ បានបើកបុកជាមួយម៉ូតូម៉ាក ហុងដា សេ១២៥ ពណ៌ខ្មៅ ស្លាកលេខ ស្ទឹងត្រែង 1C-9208 បើកបរពីទិសខាងត្បូង ទៅខាងជើង នៅត្រង់ផ្លូវបំបែកជាបួន បណ្ដាលឱ្យមនុស្សស្រី ៤នាក់ ជិះម៉ូតូតែមួយ បានស្លាប់ពីរនាក់ (ស្ត្រីម្នាក់ និងកុមារីម្នាក់) និងស្ត្រីពីរនាក់ទៀត បានរងរបួសធ្ងន់។
ក្រោយកើតហេតុ រថយន្ត និងម៉ូតូ ត្រូវបាននគរបាលចរាចរណ៍ផ្លូវគោក យកទៅរក្សាទុក នៅស្នងការដ្ឋាននគរបាល ខេត្តស្ទឹងត្រែង ដើដើម្បីរង់ចាំការដោះស្រាយតាមផ្លូវច្បាប់នៅពេលក្រោយ៕
