(ខេត្តព្រះសីហនុ) ៖ រថយន្តមួយគ្រឿងបានបើកបុកបុរសម្នាក់កំពុងជិះម៉ូតូចាំពេលក្រោយបណ្ដាលឲ្យស្លាប់ភ្លាមនៅកន្លែងកើតហេតុហើយរថយន្តបង្កបានបន្ថែមល្បឿនគេចបាត់។ ករណីគ្រោះថ្នាក់ចរាចរណ៍នេះបានកើតឡើងនាព្រឹក ថ្ងៃទី១៦ ខែធ្នូ ឆ្នាំ២០២០នៅលើផ្លូវជាតិលេខ៤ ត្រង់ចន្លោះគីឡូម៉ែត្រលេខ ២០៩-២១០ ស្ថិតនៅភូមិចំណោតរាម ឃុំបិតត្រាង ស្រុកព្រៃនប់ ។
សមត្ថកិច្ចមូលដ្ឋានបានឱ្យដឹងថា ករណីគ្រោះថ្នាក់ចរាចរណ៍នេះ បង្កឡើងដោយរថយន្ដ ១គ្រឿង មិនស្គាល់ម៉ាក មានទិសដៅពី ខេត្តព្រះសីហនុ ឆ្ពោះទៅ ភ្ភ្នំពេញ បានបុកពីក្រោយម៉ូតូ ម៉ាក HONDA WAVE ពណ៌ក្រហម គ្មានស្លាកលេខ បើកបរ ដោយបុរសឈ្មោះ កែវ វាសនា អាយុ ៣១ឆ្នាំ ជនជាតិខ្មែរ មានទីលំនៅ ក្រុងព្រះសីហនុ បណ្តាលឲ្យបើកបរម៉ូតូ ស្លាប់នៅនឹងកន្លែង កើតហេតុ ជនរងគ្រោះមិនពាក់មួកសុវត្ថិភាពទេ ។
សមត្ថកិច្ចបានបញ្ជាក់ថា រថយន្តបង្ក បានបើករត់គេចបាត់ ។ រីឯម៉ូតូរបស់ជនរងគ្រោះ បានត្រូវសមត្ថកិច្ច យកមករក្សាទុក នៅអធិការដ្ឋាននគរបាល ស្រុកព្រៃនប់៕
