(ខេត្តព្រះសីហនុ)៖ នៅព្រឹកសុក្រ ១២កើត ខែកត្តិក ឆ្នាំជូត ទោស័ក ព.ស ២៥៦៤ ត្រូវនឹងថ្ងៃសុក្រ ទី២៧ ខែឆ្នូ ២០២០ លោក គួច ចំរើន ប្រធានគណៈកម្មាធិការសាខាកាកបាទក្រហមកម្ពុជាខេត្តព្រះសីហនុ អមអមដំណើរដោយលោក លោកស្រី លោកឧកញ៉ា អនុប្រធានកិត្តិយសសាខា លោក លោកស្រី លោកឧកញ៉ា សមាជិក សមាជិកា គណៈកម្មាធិការសាខា សប្បុរសជនអ្នកវិនិយោគក្នុងខេត្ត សមាជិក សមាជិកា គណៈកម្មាធិការអនុសាខាក្រុងព្រះសីហនុ និងក្រុមប្រតិបត្តិសាខា អនុសាខា អ្នកស្ម័គ្រចិត្ត យុវជនកាកបាទក្រហម បានចុះសួរសុខទុក្ខ និងនាំយកអំណោយមនុស្សធម៌របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចែកជូនដល់ ប្រជាពលរដ្ឋក្រីក្រ ក្នុងក្រុងព្រះសីហនុ ចំនួន ៩៥៤ គ្រួសារ។
ក្នុងឱកាសនោះដែរ លោក គួច ចំរើន បានពាំនាំនូវប្រសាសន៍ផ្ដាំផ្ញើសួរសុខទុក្ខ និងក្ដីនឹករលឹក អាណិអាសូរក្រៃលែងពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្ដេចតែងតែគិតគូសុខទុក្ខប្រជាពលរដ្ឋក្រីក្រមានទុក្ខលំបាក ជនរងគ្រោះ ជនងាយរងគ្រោះ ដោយយកចិត្តទុកដាក់ខ្ពស់ និងមិនមានការរើសអើង វណ្ណៈ ជាតិសាសន៍ពណ៌សម្បុរ ឬនិន្នាការនយោបាយអ្វីឡើយ។
ជាមួយគ្នានោះ លោក គួច ចំរើន សុំឲ្យក្រុមគ្រួសារចូលរួមពីវិធីកាត់បន្ថយហានិភ័យពីការឆ្លង ជំងឺកូវីដ-១៩ ដើម្បីពង្រឹងការទប់ស្កាត់ការចម្លងក្នុងសហគមន៍ លើកកម្ពស់ការផ្លាស់ប្តូរទម្លាប់អនាម័យពីអវិជ្ជមាន ទៅវិជ្ជមាន ត្រូវបន្តជានិច្ចយកចិត្តទុកដាក់ខ្ពស់ និងត្រូវមានអនាម័យជាប្រចាំ ដោយលាងសំអាតដៃឲ្យបានញឹកញាប់ជាមួយសាប៊ូ ឬអាល់កុលហ្សែល ហើយប្រសិនបើចេញទៅទីសាធារណៈ ត្រូវពាក់ម៉ាស់ឬក្រមាឲ្យបានជាប់ជានិច្ច និងត្រូវអនុវត្តតាមការណែនាំរបស់ក្រសួងសុខាភិបាល។
ក្នុងឱកាសនោះផងដែរ លោក គួច ចំរើន បានសម្ដែង នូវការសោកស្ដាយ ដល់បងប្អូនប្រជាពលរដ្ឋ ចំនួនពីរគ្រួសារ ដែលបានបាត់បង់ ទាំងម្ដាយឪពុក មិនដែលបន្សល់ទុក លោកកូនកំព្រា ដោយសារករណីគ្រោះថ្នាក់ចរាចរណ៍ ដ៏រន្ធត់ចំនួន ២ករណីផ្សេងគ្នានៅក្នុងខែវិច្ឆិកានេះ ដែលករណីគ្រោះថ្នាក់ចរាចរណ៍នេះគឺជាសដនាដកម្មមួយ លោក មិនអាចបំភ្លេចបាន ហើយស្នើដល់ បងប្អូន ទាំងអស់ សូមមេត្តាគោរពច្បាប់ចរាចរណ៍ទាំងអស់គ្នា អ្វីៗយើងអាចធ្វើបានកសាងបាន ទិញបាន ប៉ុន្តែជីវិតមនុស្ស យើងមិនអាចទិញមកវិញបានទេ។ដូច្នេះ មានតែយើងទាំងអស់គ្នា ការពារ និងគោរពច្បាប់ ទាំងអស់គ្នាទើបយើងគេចផុត ពីហេតុការណ៍ទាំងនេះ។
លោក គួច ចំរើន បាបថ្លែងអំណរគុណដល់សប្បុរសទាំងអស់ ដែលតែងតែចូលរួមចំណែកជាមួយសាខាកាកបាទក្រហមខេត្ត ទាំងសម្ភារៈ ថវិកា ពេលវេលា ដើម្បីជួយទ្រទ្រង់ដល់សកម្មភាពមនុស្សធម៌ ចែករំលែកដល់បងប្អូនប្រជាពលរដ្ឋ ក្នុងពេលជួបការលំបាកផ្សេងៗ។
អំណោយដែលចែកជូនក្នុងមួយគ្រួសារទទួលបាន៖ អង្ករ ១បាវ (ទម្ងន់២៥គីឡូក្រាម) ត្រីខកំប៉ុង ១យួរ =១០កំប៉ុង មី ១កេសទឹកត្រី១យូរ(៦ដប) ប្រេងឆាមួយដប (មួយលិត) និងថវិកា ៥០,០០០ ៛ (ប្រាំម៉ឺនរៀល)៕
