(ភ្នំពេញ)៖ បុរសម្នាក់ដើរសុខៗស្រាប់តែដួលស្លាប់ភ្លាមៗ តែមន្ត្រីពេទ្យជំនាញ និងសមត្ថកិច្ចចុះទៅពិនិត្យបានឲ្យថាបុរសរូបនេះស្លាប់ដោយសារខ្យល់គរ។ ហេតុការណ៍នេះបានកើតឡើងនៅវេលាម៉ោងង ១១ និង ២០នាទីព្រឹកថ្ងៃទី ១៤ ខែសីហា ឆ្នាំ២០២០ តាមបណ្តោយផ្លូវលេខ ៤៧ ខាងមុខវត្តព្រះពុទ្ធឃោសាចារ្យ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
សមត្ថកិច្ចបានបញ្ជាក់ថា សពបុរសរូបនេះគេនៅមិនទាន់ស្គាល់អត្តសញ្ញាណនៅឡើយទេ មានវ័យប្រហែល៣០ឆ្នាំ ។ ហើយប្រជាពលរដ្ឋបានឱ្យដឹងថា មុនពេលកើតហេតុ ជនរងគ្រោះ បានទបានទៅចូលអង្គុយផឹកកាហ្វេមួយកន្លែង តែត្រូវបានម្ចាស់ហាងដេញចេញ។ ជនរងគ្រោះបានចាកចេញដើរមកដល់របងវត្តហើយឈរកាន់ដងទង់ជាតិ មានសភាពយោលខ្លួន ហើយមួយសន្ទុះក្រោយមកស្រាប់តែឃើញបុរសរូបនេះដួលស្លាប់ភ្លាមៗនៅនឹងកន្លែងកើតហេតុតែម្តង។
បន្ទាប់ពីកើតហេតុសមត្ថកិច្ចមូលដ្ឋានបានចុះមកដល់ និងទាក់ទងទៅខាងជំនាញពិនិត្យកោសល្យ វិច័យ ចុះមកពិនិត្យដោយបញ្ជាក់ថា បុរសរូបនេះស្លាប់ដោយសារខ្យល់គរ រួចបានធ្វើកំណត់ហេតុប្រគល់សពឱ្យទៅរថយន្តសាមុយដឹក យកទៅតម្កល់នៅវត្តទឹកថ្លា ដើម្បីរង់ចាំក្រុមគ្រួសារយកទៅធ្វើបុណ្យ ៕
