(ភ្នំពេញ)៖ បុរសជាកម្មកររោងចក្រម្នាក់ចេញពីជប់លៀងផ្ទះមិត្តភក្កិបោះពួយម៉ូតូលឿនជ្រុលទៅបុកម៉ូតូកំពុងបើកបញ្ច្រាសទិសពេញទាំងអស់បណ្ដាលឱ្យដួលស្លាប់ខ្លួនឯងនឹងបង្កឲ្យភាគីម្ខាងទៀតរងរបួសធ្ងន់។ កាលពីវេលាម៉ោង១១យប់ ថ្ងៃទី៤ ខែកក្កដា ឆ្នាំ២០២០ នៅចំណុចមុខអគ្គបញ្ជាការរដ្ឋានកងទ័ពជើងគោក តាមបណ្តោយផ្លូវជាតិលេខ៤ ស្ថិតក្នុងភូមិព្រៃបឹង សង្កាត់កន្ទោក ខណ្ឌកំបូល។
ជនរងគ្រោះដែលស្លាប់ឈ្មោះផា វិបុល ភេទប្រុសអាយុ២៦ឆ្នាំ មុខរបរ កម្មកររោងចក្រ ស្នាក់នៅខណ្ឌកំបូល។
មុនពេលកើតហេតុគេបានឃើញម៉ូតូម៉ាកXR ពណ៌ក្រហម ពពាក់ស្លាកលេខភ្នំពេញ1BR- 8628 ធ្វើដំណើរ តាមបណ្តោយផ្លូវជាតិលេខ៤ក្នុងទិសដៅពីកើតទៅលិចដែលទើប និងចេញពីកម្មវិធីមិត្តភក្តិ ខណៈមក ដល់ចំណុចកើតហេតុស្រាប់តែរេចង្កូតទៅបុកជាមួយម៉ូតូម៉ាកហុងដាឌ្រីមសង់ពណ៌ ខ្មៅ ពាក់ស្លាកលេខត្បូងឃ្មុំ 1A-3062 ជិះគ្នា២នាក់ធ្វើដំណើរបញ្ច្រាស់ទិសគ្នា ពេញទំហឹងបណ្តាលឱ្យភាគីខាងម៉ូតូXR ស្លាប់នៅកន្លែងកើតហេតុនិងភាគីខាងម៉ូតូហុងដារងរបួសធ្ងន់ធ្ងរត្រូវបានបញ្ជូនទៅមន្ទីរពេទ្យភ្លាមៗ។
សមត្ថកិច្ចបានចុះទៅដល់ចំណុចកើតហេតុ និងទំនាក់ទំនងទៅក្រុមគ្រួសារ មកទទួលយកទៅធ្វើបុណ្យតាមប្រពៃណី ចំណែកម៉ូតូត្រូវបានជំនាញចរាចរណ៍ផ្លូវគោករាជធានីធ្វើការវាស់វែងយកទៅរក្សាទុករងចាំដោះស្រាយតាមច្បាប់៕
