(ខេត្តបាត់ដំបង) ៖ រថយន្ត samyong កំពុងតែបើកបរក្នុងល្បឿនលឿនបានរេចង្កូតទៅខាងឆ្វេងដៃបុកជាមួយនឹងរថយន្តម៉ាក RANGE ROVER
កំពុងបើកបរបញ្ច្រាសទិសគ្នាចំពេញទំហឹងបណ្ដាលឱ្យខូចខាតក្បាលរថយន្តទាំងពីរធ្ងន់ធ្ងរ និងបានបង្កឲ្យមនុស្ស ៤នាក់រងរបួស ហើយបានស្លាប់២នាក់នៅពេលបញ្ជូនទៅដល់មន្ទីរពេទ្យ។ ករណីគ្រោះថ្នាក់ចរាចរណ៍ដ៏រន្ធត់នេះនេះ បានកើតឡើង នៅវេលាម៉ោង ៨ និង៤០នាទី កាលពីយប់ថ្ងៃទី១២ ខែសីហា ឆ្នាំ២០២០ ត្រង់ចំណុចភូមិស្វាយវែង ឃុំកំរៀង ស្រុកកំរៀង ខេត្តបាត់ដំបង។
សមត្ថកិច្ចបានឱ្យដឹងថា រថយន្តម៉ាកសាំយ៉ុងយ៉ុង ពណ៌ស ពាក់ស្លាកលេខ បាត់ដំបង 2A-8375 បើកបរក្នុងល្បឿនលឿនបានរេចង្កូតទៅខាងឆ្វេងដៃចូលទៅកន្លងទើបបញ្ច្រាស់បានបុកជាមួយនឹងរថយន្តម៉ាក RANGE ROVER ពណ៌ស ពាក់ស្លាកលេខ ភ្នំពេញ2BI-5959 ចំពីមុខបណ្ដាលឱ្យរួញក្បាលរថយន្តខូចខាតធ្ងន់ធ្ងរ។ ក្នុងហេតុការណ៍នេះបណ្តាលឱ្យអ្នកបើកបររថយន្តសាំយ៉ុង ត្រូវបានកៀបបាក់ជើង រីឯអ្នករួមដំណើរចំនួន ២ នាក់ទៀតក៏រងរបួសដែរ ចំណែកអ្នកបើកបររថយន្ត RANGE ROVER ក៏រងរបួសដែរតែស្រាល។
បន្ទាប់ពីសមត្ថកិច្ចជំនាញ បានចុះទៅពិនិត្យទីតាំងកើតហេតុរួចមក ក៏បានបញ្ជូនជនរងគ្រោះទាំងអស់ទៅកាន់មន្ទីរពេទ្យខេត្តប៉ៃលិន ប៉ុន្តែជាអកុសលអ្នកបើកបររថយន្តសាំយ៉ុង ដែលបាក់ជើង និងអ្នករួមដំណើរ ដែលអង្គុយក្បែរត្រូវបានស្លាប់ទាំង ២ ននាក់៕
