(ខេត្តស្វាយរៀង)៖ បុរសម្នាក់បើកបររថយន្តបាឡែនក្នុងស្ថានភាពស្រវឹងហើយលឿន បានបុកជាមួយរថយន្ត ហាយឡែនឌ័រពេញទំហឹងខណៈកំពុងបើកបរផ្ទុយទិសគ្នា បណ្ដាលឱ្យខូចខាតក្បាលរថយន្តធ្ងន់ធ្ងរទាំងសងខាង និងបង្កឲ្យមនុស្សពីរនាក់រងរបួស។ ករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១៤ និង៣០នាទីរសៀលថ្ងៃទី៩ ខែសីហា ឆ្នាំ២០២០ នៅចំណុចខាងមុខផែស្ងួតសូងួន ចន្លោះគីឡូម៉ែត្រលេខ ១៦៤-១៦៥ ស្ថិតក្នុង បាវិតកណ្ដាល សង្កាត់បាវិតក្រុងបាវិត ខេត្តស្វាយរៀង។
សមត្ថកិច្ចបានឱ្យដឹងថា រថយន្តម៉ាក Camery បាឡែន ពណ៌ទឹកប្រាក់ ពាក់ស្លាកលេខ ភ្នំពេញ2U-5806 បើកបរដោយឈ្មោះ អុឹម សុីវ៉ូន ភេទប្រុស អាយុ២៩ឆ្នាំ ជនជាតិខ្មែរ មុខរបរបើកបរ មានទីលំនៅ ភូមិទួលច្រេស ឃុំកំពង់អំពិល ស្រុករំដួល ខេត្តស្វាយរៀង និងអ្នករួមដំណើរឈ្មោះ ថៃ ពុតឌី ភេទប្រុស អាយុ៣៧ ឆ្នាំ មុខរបរកម្មករសំណង់ មានទីលំនៅភូមិតាកុត ឃុំត្រពាំងស្ដៅ ស្រុករមាសហែក ខេត្តស្វាយរៀង (របួសស្រាល) បើកបរក្នុងទិសដៅពីលិចទៅកើត។
លុះមកដល់ចំណុចកើតហេតុបានបុកជាមួយនឹង រថយន្តមួយគ្រឿងទៀតម៉ាក Hilander ពណ៌ ទឹកមាស ពាក់ស្លាកលេខ ភ្នំពេញ 2W-3807 បើកបរដោយឈ្មោះ រស់ សុភា ភេទប្រុស អាយុ៣៣ឆ្នាំ ជនជាតិខ្មែរ មានទីលំនៅភូមិឫស្សីជួរខាងត្បូង ឃុំក្រោលគោ ស្រុកស្វាយជ្រុំ ខេត្តស្វាយរៀង ក្នុងទិសដៅបញ្ច្រាសគ្នា បើកបបណ្ដាលឱ្យរថយន្តខូចធ្ងន់ និងអ្នកបើកបរគ្មានរងរបួស។
បច្ចុប្បន្ន អ្នករងរបួសព្យាបាលនៅមន្ទីរពេទ្យសោភ័ណ្ឌអូវ៉ាង។ ចំណែកឯរថយន្តទាំង០២ គ្រឿង សមត្ថកិច្ចយកមករក្សាទុកនៅអធិការដ្ឋាននគរបាលក្រុងបាវិត ដើម្បីចាត់ការតាមនិតិវិធីច្បាប់៕
