(ភ្នំពេញ)៖ រថយន្តដឹកទូកុងទឺន័រមួយគ្រឿងកំពុងស៊ីញ៉ូបត់ឆ្លងផ្លូវ ស្រាប់តែមានរថយន្តដឹកទឹកកកមួយគ្រឿងទៅបុកយ៉ាងពេញទំហឹង បណ្តាលឱ្យរងការខូចខាតរថយន្តទាំងសងខាងនៅមនុស្សពីរនាក់រងរបួសធ្ងន់ស្រាល។ ករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង ៣និង៤០នាទី ទៀបភ្លឺថ្ងៃអាទិត្យ ទី២ ខែសីហា ឆ្នាំ២០២០ ស្ថិតនៅតាមបណ្តោយផ្លូវ វេងស្រេង ភូមិចោមចៅ២ សង្កាត់ចោមចៅ២ ខណ្ឌពោធិ៍សែនជ័យ។
សមត្ថកិច្ចបានឱ្យដឹងថា បុរសម្នាក់ បើករថយន្តដឹកទូកុងទឺន័រធុនធំ ពណ៌ខៀវមួយគ្រឿង ពាក់ស្លាកលេខខាងមុខ ភ្នំពេញ 3B- 8398 ស្លាកលេខខាងក្រោយភ្នំពេញ 4A -6151 បើកតាមបណ្តោយផ្លូវវេងស្រេងទិសដៅពីលិចទៅកើត ស៊ីញ៉ូបម្រុងបត់ត្រឡប់ក្រោយ ស្រាប់តែមានរថយន្តម៉ាកហ៊ីយន់ដាយដឹកទឹកកកមួយគ្រឿង ពណ៌ខៀវ ពាក់ស្លាកលេខពោធិ៍សាត់ 3A- 0039 បើកបរដោយបុរស១នាក់ និងអ្នករួមដំណើរជា១នាក់ រថយន្តមានភ្លើងបំភ្លឺទៀត ស្របទិសដៅគ្នា បើកក្នុងល្បឿនលឿនពេកជ្រុលទៅបុករថយន្តកុងទឺន័រខាងលើ ដែលកំពុងតែបត់នោះយ៉ាងពេញទំហឹង បណ្តាលឱ្យរងការខូចខាតរថយន្តដឹកទឹកកកផ្នែកខាងមុខ ស្ទើរតែទាំងស្រុង រីឯរថយន្តកុងទឺន័រវិញបាក់កាងបែកធុងប្រេងហូរចេញមកក្រៅ និងបង្កឱ្យតៃកុងរថយន្តដឹកទឹកកករងរបួសស្រាល ចំណែកព្រូរថយន្តដឹកទឹកកកវិញគៀបជើងជាប់កាបីនរថយន្តរងរបួសធ្ងន់។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ទីតាំងកើតហេតុ ទាក់ទងទៅកាន់សមត្ថកិច្ចជំនាញឱ្យមកវាស់វែង និងយករថយន្តទាំង២គ្រឿង ទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើមដើម្បីរង់ចាំដោះស្រាយពេលក្រោយ៕
