(ខេត្តកំពត)៖ ស្ត្រីម្នាក់ត្រូវរថយន្តស៊ីទែនផ្ទុកស៊ីម៉ងត៍បុកបណ្តាលឱ្យស្លាប់ពេលកំពុងដើរឆ្លងថ្នល់។ហេតុការណ៍នេះបានកើតឡើងនៅលើកំណាត់ផ្លូវជាតិលេខ៣៣ ស្ថិតក្នុងភូមិកណ្តាលទួល ឃុំកំពង់ត្រាចខាងលិច ស្រុកកំពង់ត្រាច កាលពីរសៀលថ្ងៃទី២៩ ខែកក្កដាឆ្នាំ២០២០។
មន្ត្រីនគរបាលចរាចរណ៍ខេត្តកំពតបានឱ្យដឹងថា ស្ត្រីដែលបាត់បង់ជីវិតក្នុងករណីគ្រោះថ្នាក់ចរាចរណ៍នោះឈ្មោះង៉ែត នូច អាយុ៥៤ឆ្នាំ នៅភូមិស្រូវលើ ឃុំដងទង់ ស្រុកដងទង់ខេត្តកំពត។ គ្រោះថ្នាក់ចរាចរណ៍នេះដោយសាររថយន្តធុនធំស៊ីទែនផ្ទុកស៊ីម៉ងត៍បានបើកបុកជនរងគ្រោះខណៈកំពុងដើរឆ្លងផ្លូវស្លាប់ភ្លាមៗ។
ប្រភពដដែលបានបញ្ជាក់ថា ស្ត្រីរងគ្រោះបានចុះពីរថយន្តកំពុងចតនៅមុខរោងចក្រពូចិន រួចដើរឆ្លងផ្លូវស្របពេលនោះស្រាប់តែមានរថយន្តដឹកស៊ីម៉ងត៍បើកក្នុងល្បឿនលឿន ហើយបុកជនរងគ្រេាះពេញទំហឹងបណ្តាលឱ្យស្លាប់។ ក្រោយពីបង្កហេតុអ្នកបើកបរក៏បញ្ឈប់រថយន្តរួចរត់គេចបាត់៕
