(ភ្នំពេញ)៖ បុរសពីរនាក់បានបែកក្បាលស្លាប់គរលើ់គ្នាលើម៉ូតូហូរឈាមជោកថ្នល់ បន្ទាប់ពីចេញពីផឹកស៊ីជិះម៉ូតូឌុបគ្នាក្នុងល្បឿនលឿន ជ្រុលទៅបុករថយន្តដឹកដីពីក្រោយពេញទំហឹង។ ហេតុការណ៍នេះកើតឡើងកាលវេលាម៉ោង៩ និង២០នាទី យប់ថ្ងៃអង្គារ ទី២៨ ខែកក្កដា ឆ្នាំ២០២០ ស្ថិតតាមបណ្ដោយផ្លូវជាតិលេខ១ សង្កាត់ក្បាលកោះ ខណ្ឌច្បារអំពៅ។
សមត្ថកិច្ចបានឱ្យដឹងថា សពជនរងគ្រោះទី១ ឈ្មោះ ពៅ ចាន់ធា ភេទប្រុស អាយុ២៥ឆ្នាំ មុខរបលក់គ្រឿងសំណង់ឱ្យក្រុមហ៊ុន ស្នាក់នៅភូមិចន្លក់ ឃុំគគីរ ស្រុកកៀនស្វាយ ខេត្តកណ្ដាល។ សពទី២ ឈ្មោះ ដូ ភេទប្រុស អាយុ៣០ឆ្នាំ។
ប្រភពពីកន្លែងកើតហេតុបានឲ្យដឹងថា មុនពេលកើតហេតុ គេឃើញបុរសពីរនាក់ជិះម៉ូតូឃ្លីក ពណ៌ស ពាក់ស្លាកលេខ ភ្នំពេញ 1GL- 9895 ធ្វើដំណើរតាមបណ្តោយផ្លូវជាតិលេខ១ ពីកើតទៅលិចទើបតែចេញពីហូបស៊ុបក្នុងល្បឿនលឿន ខណៈមកដល់ចំណុចកើតហេតុខាងលើ បានជ្រុលទៅបុកគូទរថយន្តដឹកដីក្បាលពណ៌ក្រហម ពាក់ផ្លាកលេខចង្កូតស្តាំ PP-0912 ពីក្រោយពេញទំហឹង បបណ្ដាលឱ្យបោកផ្ទប់នឹងរថយន្តបែកក្បាលទាំងពីរនាក់ស្លាប់ភ្លាមៗ។ ពេលនោះដែរ រថយន្តបង្កបានព្យាយាមបើករត់ចូលក្នុងវត្ត រួចទុករថយន្តចោលគេចខ្លួនបាត់។
ក្រោយកើតហេតុ សមត្ថកិច្ចមូលដ្ឋានទាក់ទងជំនាញវាស់វែងយករថយន្ត និងម៉ូតូ ទៅរក្សាទុកនៅការិយាល័យចរាចរណ៍ផ្លូវគោកស្នងការាជធានីភ្នំពេញ រង់ចាំដោះស្រាយតាមផ្លូវច្បាប់។ ចំចំណែកសពសមត្ថកិច្ចបានប្រគល់ឲ្យក្រុមគ្រួសារយកទៅធ្វើបុណ្យ៕
