(ខេត្តព្រះវិហារ)៖ ក្មេងប្រុសម្នាក់បានស្លាប់ភ្លាមៗ និងមនុស្ស៣នាក់ទៀតបានរងរបួសធ្ងន់ស្រាល ដោយសារផ្ទុះក្បាលគ្រាប់ត្បាល់ប្រភេទ៦០ម.ម.។ហេតុការណ៍នេះបានកើតឡើងនៅចំណុចដូនម៉ុកស្ថិតក្នុងឃុំកន្ទួតស្រុកជាំក្សាន្តខេត្តព្រះវិហារកាលពីវេលាថ្ងៃត្រង់ថ្ងៃទី២៦ ខែកក្កដា ឆ្នាំ២០២០។
តាមការបញ្ជាក់ពីលោកវរសេនីយ៏ទោឱសេងអធិកានគរបាលស្រុកជាំក្សាន្តបានឱ្យដឹងថា ហេតុដែលបណ្តាលឱ្យមានករណីផ្ទុះគ្រាប់យុទ្ធភណ្ឌប្រភេទក្បាលគ្រាប់ត្បាល់៦០.ម.មនេះដោយឪពុករបស់កុមារារងគ្រោះបានទៅស្រែហើយក៏បានប្រទះឃើញក្បាលគ្រាប់ត្បាល់ប្រភេទ.៦០.ម.ម.។ បុរសនោះក៏បានរើសកាន់មកទុកចោលនៅក្បែផ្ទះដោយខ្លួន។
លោកវរសេនីយ៏ទោឱសេងបានបន្តថា ចៃដន្យកូនរបស់ខ្លួនរួមនឹងកុមារីចំនួន២នាក់ទៀត បានបបួលគ្នាមកលេង។ តែមិននឹកស្មានថាកូនរបស់ខ្លួន និងគ្នីគ្នាគេនោះបានយកក្បាលគ្រាប់ត្បាល់ដែលខ្លួនបានរើសយកមកទុកនោះយកទៅដំលេង។ ដោយខ្លួនមិនបានចាប់អារម្មណ៍តែនៅសុខៗក៏សំឡេងផ្ទុះឡើងយ៉ាងកក្រើកផ្ទះ។ ក្រោយដុំផ្សែងខ្មៅបានរសាត់បាត់ទៅបន្សល់ទុកនៅសាកសពកូន។
គួរបញ្ជាក់ថាកុមារាកុមារីដែលរងគ្រោះក្នុងការផ្ទុះក្បាលគ្រាប់ត្បាល់ប្រភេទ៦០ម.មនោះរួមមាន៖ទី១ឈ្មោះ ស្មាន់ ម៉ា ភេទប្រុស អាយុ៥ឆ្នាំ ស្លាប់នៅនឹងកន្លែងកើតហេតុ, ទី២ឈ្មោះ អឹម ម៉ារ៉ា ភេទស្រីអាយុ៤ឆ្នាំ រងរបួសធ្ងន់, ទី៣ឈ្មោះ ហេង ពៅភេទស្រី អាយុ៤ឆ្នាំ រងរបួសធ្ងន់, ទី៤ឈ្មោះ សំ ស្មាន ភេទប្រុស អាយុ៤២ឆ្នាំ រងរបួសជើង ដែលត្រូវជាឪពុកបង្កើតរបស់សាកសពកុមារារងគ្រោះបច្ចុប្បន្នស្នាក់នៅភូមិឃុំនឹងស្រុកកើតហេតុ។
ក្រោយកើតហេតុសមត្ថកិច្ចមូលដ្ឋានបានចុះទៅធ្វើកោសល្យវិច្ច័យដោយសមត្ថកិច្ចសន្និដ្ឋានឃើញថាកុមារាដែលស្លាប់ និងរងរបួសនេះពិតជាស្លាប់ និងរងរបួសដោយសារតែផ្ទុះគ្រាប់ពិតប្រាកដមែន៕
