(ខេត្តស្ទឹងត្រែង)៖ រថយន្តសាំយ៉ុងដឹកអ្នកដំ ណើរ មីខេត្តត្បូងឃ្មុំទៅកាន់ខេត្តរតនគិរី បើកបរក្នុងល្បឿនលឿន រហូតដល់គ្រប់គ្រងលែងបានរេចង្កូតធ្លាក់ផ្លូវក្រឡាប់ជាច្រើនត្រឡប់ បណ្ដាលឲ្យអ្នកជិះក្នុងរថយន្តប្រុសស្រីចំនួន៣នាក់ ស្លាប់ភ្លាមៗ និង ៥នាក់ផ្សេងទៀតរងរបួសធ្ងន់ស្រាល។
ករណីគ្រោះថ្នាក់ចរាចរណ៍ដ៏រន្ធត់នេះបានកើតឡើងកាលពីវេលាម៉ោង១១ និង២០នាទី ព្រឹកថ្ងៃទី ១៦ ខែកក្កដា ឆ្នាំ២០២០ នៅលើដងផ្លូវជាតិលេខ៧៨ ត្រង់ចំណុចជ្រាយព្រំប្រទល់ ឃុំក្បាលមាស ស្រុកសេសាន ខេត្តស្ទឹងត្រែង និងខេត្តមណ្ឌលគិរី។
សមត្ថកិច្ចបានបន្តឱ្យដឹងថា រថយន្តក្រឡាប់ខាងលើជាប្រភេទរថយន្តសាំយ៉ុង ពាក់ស្លាកលេខភ្នំពេញ2W-9428 ពណ៌លឿង បានដឹកអ្នកដំណើរចំនួន៨នាក់ រួមនឹងតៃកុងជាអ្នកបើកបរម្នាក់ ចេញពីខេត្តត្បូងឃ្មុំ ទៅកាន់ខេត្តរតនគិរី។ លុះមកដល់ចំណុចព្រំប្រទល់ស្រុកសេសានខេត្តស្ទឹងត្រែងរតនគិរី និងមណ្ឌលគិរី រថយន្តរេធ្លាក់ផ្លូវក្រឡាប់ជាច្រើនត្រឡប់ បណ្តាលឱ្យមនុស្សក្នុងរថយន្តចំនួន៨នាក់ ៣នាក់បានស្លាប់ និង ៥នាក់ រងរបួសធ្ងន់-ស្រាល ត្រូវបានបញ្ជូនទៅព្យាបាលនៅមណ្ឌលសុខភាពច្រប់។ ចំណែកតៃកុងក្រោយកើតហេតុ ត្រូវបានរត់គេចខ្លួន។
សមត្ថកិច្ចយករថយន្តមករក្សាទុកនៅប៉ុស្តិ៍នគរបាល។ ចំណែកសពជនរងគ្រោះបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
