(ភ្នំពេញ)៖ យូរជន ២នាក់ជិះម៉ូតូឌុបគ្នាក្នុងល្បឿនយ៉ាងលឿនវ៉ាកអើនឹងរថយន្តហើយចាប់ហ្វ្រ័ងមិនទាន់ក៏ជ្រុលទៅបុករថយន្តឡិចស៊ីសដែលបេីកចេញពីក្លិបវាយកូនហ្គោលពេញទំហឹងបណ្ដាលឲ្យស្លាប់ម្នាក់ភ្លាមៗនិងរបួសធ្ងន់ម្នាក់ កាលពីវេលាម៉ោង២រសៀលថ្ងៃទី ៣០ ខែមិថុនា ឆ្នាំ២០២០ នៅត្រង់ចំណុចមុខក្លិបវាយកូនហ្គោល តាមបណ្តោយមហាវិថីឈ្នះឈ្នះ ស្ថិតក្នុងភូមិត្រពាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
សមត្ថកិច្ចបានឱ្យដឹងថា ជនរងគ្រោះដែលស្លាប់ឈ្មោះពុធ ឃីម ភេទប្រុស អាយុ២០ ឆ្នាំ មុខរបរកម្មករចាក់លូ ស្នាក់នៅម្តុំបឹងតាមោក ខណ្ឌព្រែកព្នៅ មានស្រុកកំណេីតនៅខេត្តស្វាយរៀង។
សមត្ថកិច្ចបានបឋញ្ជាក់ឱ្យដឹងថា មុនពេលកេីតហេតុគេបានឃេីញបុរសម្នាក់ បេីករថយន្តម៉ាកឡិចស៊ីស ពណ៌ស្ករ ពាក់ស្លាកលេខកណ្តាល2A-9358 ចេញពីក្លិបវាយកូនហ្គោល ក្នុងទិសដៅពីលិចទៅកេីត ឡេីងលេីផ្លូវវិមានឈ្នះឈ្នះ តែកង់ខាងមុខមិនទាន់ដល់ផ្លូវវិមានឈ្នះឈ្នះផង ស្រាប់តែមានយុវជន២ នាក់ ជិះម៉ូតូម៉ាកហុងដាឌ្រីម សេ១២៥ ស៊េរីឆ្នាំ២០១៦ ពាក់ស្លាកលេខភ្នំពេញ1FV-9071 ក្នុងទិសដៅពីជេីងទៅត្បូង ក្នុងល្បឿនលឿនបានជ្រុលទៅបុករថយន្តចំពីចំហៀងពេញទំហឹងបណ្តាលឱ្យស្លាប់ម្នាក់ជាប់ខាងក្រោមរថយន្តចំណែកម្នាក់ទៀតរងរបួសធ្ងន់។
ក្រោយកេីតហេតុជនរងគ្រោះដែលរបួសធ្ងន់ត្រូវបានបញ្ជូនទៅសង្គ្រោះនៅមន្ទីរពេទ្យភ្លាមៗ។ ចំណែកសពត្រូវបានសមត្ថកិច្ចទាក់ទងទៅក្រុមគ្រួសារមកទទួលយកទៅធ្វេីបុណ្យតាមប្រពៃណី។ ដោយឡែករថយន្ត និងម៉ូតូត្រូវបានសមត្ថកិច្ចជំនាញធ្វេីការវាស់ វែងយកទៅការិយាល័យចរាចរណ៍ជេីងគោករាជធានីភ្នំពេញ៕
