(ខេត្តបន្ទាយមានជ័យ) ៖ រថយនរថយន្តដឹកទំនិញធុនធំ បើកភ្នែកជាមួយរថយន្តដឹកឥដ្ឋពេញទំហឹងនៅកន្លែងមុខជញ្ជីងថ្លឹងរថយន្ត បណ្តាលឱ្យមនុស្សស្លាប់១នាក់ និងរបួសធ្ងន់២នាក់ កាលពីវេលាម៉ោង៦ និង១៥នាទីព្រឹក ថ្ងៃទី២២ ខែមិថុនា ឆ្នាំ២០២០ នៅចំណុចស្ថានីយថ្លឹងរថយន្តកូនដំរី ស្ថិតក្នុងភូមិនិមិត្តថ្មី សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។
នគរបាលចរាចរណ៍ក្រុងប៉ោយប៉ែត បានឱ្យដឹងថា ជនរងគ្រោះអ្នកបើករថយន្ត កូរ៉េ កែច្នៃ ដឹកឥដ្ឋ ស្លាប់នៅកន្លែងមានឈ្មោះ ផៃ ភេទប្រុស អាយុប្រហែល ជិត៣៩ឆ្នាំ និងអ្នករួមដំណើរចំនួន២នាក់រងរបួសធ្ងន់ មានឈ្មោះ ទី១-ឡម អៀង ភេទស្រី អាយុ៣០ឆ្នាំ និង ទី២-ឈ្មោះ ប្រុស អាយុ៣១ឆ្នាំ ភេទប្រុស អ្នកទាំង៣នាក់ខាងលើ រស់នៅ ឃុំសំបួរ ស្រុកក្រឡាញ់ ខេត្តសៀមរាប។ ជនរងគ្រោះរបួសធ្ងន់ទាំង២នាក់ ត្រូវបានកម្លាំងនគរបាលហៅរថយន្តសង្គ្រោះរបស់មន្ទីរពេទ្យបង្អែក កក្រុងប៉ោយប៉ែត។
នគរបាលបានបញ្ជាក់ឱ្យដឹងទៀតថា តាមការ ស្រាវជ្រាវ នៅមុនពេលកើតហេតុរថយន្តកូរ៉េ កែច្នៃដឹកឥដ្ឋពេញ បានបើកពីទិសខាងកើតទៅលិច ពេលបើកដល់កន្លែងកើតហេតុចំណុចស្ថានីយថ្លឹងរថយន្តកូនដំរី រថយន្តធុនធំ ម៉ាកហីយ៉ានដាយ ពណ៌ស ពាក់ស្លាកលេខ ភ្នំពេញ 3D-3939 បើកចេញពីស្ថានីយថ្លឹងរថយន្តរួចបានបត់ទៅលិច មិនបានមើលឆ្វេងស្តាំ បណ្តាលឱ្យបើកទៅបុករថយន្តមកូរ៉េ ច្នៃដឹកឥដ្ឋបុកពេញទំហឹង បណ្តាលឲ្យអ្នកបើករថយន្តដឹកឥដ្ឋស្លាប់ ហើយអ្នករួមដំណើររបួសធ្ងន់។ ចំណែកអ្នកបើក រថយន្តធុនធំក្រោយពីបង្កហេតុ បានបើកទ្វាររថយន្តរត់គេចខ្លួនបាត់។
នគរបាលចរាចរណ៍ក្រុងប៉ោយប៉ែត បានបញ្ជាក់ឱ្យដឹងថា ករណីគ្រោះថ្នាក់ចរាចរណ៍នេះ មូលហេតុបង្កបណ្តាលមកពីរថយន្តធុនធំ ក្រោយពីធ្វើការថ្លឹងរួចហើយបើកចេញពីស្ថានីយថ្លឹងបត់ប្តូរទិសមិនគោរពសិទ្ធអាទិភាព។ ចំណែរថយន្តកូរ៉េដឹកឥដ្ឋបើកលឿនពេលជួបហេតុការណ៍ស្លន់បាត់ស្មារតីមិនបានជាន់ហ្វ្រាំង។ ក្រោយវាស់វែងតាមបច្ចេកទេស រថយន្តខូចធ្ងន់ទាំង២គ្រឿង ត្រូវបាននគរបាលនាំយកមករក្សាទុកនៅអធិការដ្ឋាននគរបាលក្រុងប៉ោយប៉ែត ដើម្បី រង់ចាំធ្វើការដោះស្រាយតាមនីតិវិធីច្បាប់៕
