(ភ្នំពេញ) ៖ ស្ត្រីម្នាក់បើករថយន្ត ហ៊ីលុច វីហ្គោ លឿនរហូតដល់គ្រប់គ្រងមិនបាន គាត់ជ្រុលទៅបុកនឹងរថយន្តកាមរីបាឡែនមួយគ្រឿងផ្ទប់នឹងគល់ឈើបណ្ដាលឱ្យរថយន្តទាំង ២រងការខូចខាតយ៉ាងដំណំ ហើយម្ចាស់រថយន្តកាមរីបានរងរបួសដៃជាទម្ងន់។
ហេតុការណ៍គ្រោះថ្នាក់ចរាចរណ៍នេះបានកើតឡើងនាម៉ោងជិត២រសៀលថ្ងៃព្រហស្បត៍ ទី២១ ខែឧសភា ឆ្នាំ២០២០នេះ នៅចំណុចផ្លូវបំបែកជាបួន លើផ្លូវព្រះនរោត្តម កែងផ្លូវលេខ១៤៤ ស្ថិតក្នុងសង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ។
សមត្ថកិច្ចបានបញ្ជាក់ថា រថយន្តហុីលុចបើកបរដោយស្ត្រីបានបុករថយន្តកាមរីបាឡែនខ្ទាតបោកផ្ទប់នឹងដើមឈើ និងបង្គោលស្លាកសញ្ញាប្រាប់លេខផ្លូវ រងការខូចខាតរថយន្តខ្ទេចយ៉ាងដំណំ និងបណ្ដាលឱ្យបុរសម្ចាស់រថយន្តកាម៉ារី រងរបួសដៃធ្ងន់គួរសម ។ ចំណែករថយន្តបង្កមិនព្រមឈប់ដោះស្រាយទេ បានព្យាយាមបើករថយន្តរត់គេចពីកន្លែងកើតហេតុ រហូតដល់ផ្លូវ២៩៤ ជិតវិមានឯករាជ្យ សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ ទើបត្រូវបានប្រជាពលរដ្ឋ និងសមត្ថកិច្ចសហការគ្នា ប្រដេញតាមឃាត់បានទាំងរថយន្ត និងអ្នកបើករថយន្តផងដែរ ។
ក្រោយពីឃាត់រថយ្តបង្ក ន៨ងម្ចាស់ បានសមត្ថកិច្ចកំពុងរងចាំប្រគល់ឱ្យផ្នែកជំនាញ យកត្រូវដោះស្រាយទៅតាមច្បាប់៕
