(ស្រុកព្រៃនប់)៖ ព្រឹកថ្ងៃទី១០ ខែឧសភា ឆ្នាំ២០២០នេះ ពលរដ្ឋនៅក្នុងឃុំតានៃ ស្រុកព្រៃនប់ ខេត្តព្រះសីហនុចំនួន២៥០គ្រួសារទៀត បានទទួលអំណោយមានអង្ករ ថ្នាំពេទ្យ និងសាប៊ូលៀងដៃ ពីរដ្ឋបាលឃុំតានៃបន្តទៀត។
បើតាម លោកអ៊ុក សាវឿត មេឃុំតានៃ បានប្រាប់ឱ្យដឹងថា នេះជាការចែកជូនបន្ថែមទៀតដល់ពលរដ្ឋមួយចំនួនដែលលោកមានជីវភាពខ្វះខាតមិនសូវបានចេញប្រកបមុខរបរ ក្នុងដំណាក់កាល ការពារមិនឱ្យឆ្លងជំងឺខូវីដ១៩ ដែលគិតមកទល់ខែឧសភានេះ ការចែកជូនប្រជាពលរដ្ឋក្នុងឃុំតានៃបានចំនួន៤៥០គ្រួសារហើយ ដោយក្នុងមួយគ្រួសារទទួលបានអង្ករ ១០គីឡូក្រាម ថ្នាំពេទ្យ០២បន្ទះ សាប៊ូលៀងដៃ និងក្រមាមួយចំនួនផងដែរ ។
លោកមេឃុំបានបន្តថា អំណោយដែលចែកជូនជាបន្តបន្ទាប់នេះ បានមកពីការជួយឧបត្ថម្ភ ពី ឯកឧត្តមតាក វណ្ណថា អ្នកតំណាងរាស្ត្រមណ្ឌលខេត្តព្រះសីហនុ ឯកឧត្តម ឈី ហុង ឯកឧត្តម ជា សំអាង ប្រធានក្រុមការងារចុះជួយឃុំតានៃ លោក ឡុង ស៊ីថាផេន ប្រធានក្រុមការងារចល័ត និងលោកវរសេនីយ៍ទោ ហួ យ៉ៃ អធិការនគរបាលស្រុកព្រៃនប់ផងដែរ៕
