(ខេត្តស្ទឹងត្រែង)៖ ហេតុការណ៍គ្រោះថ្នាក់ចរាចរណ៍នេះ បានកើតឡើងវេលានៅវេលាម៉ោង១០ព្រឹកថ្ងៃទី១៩ ខែមេសា ឆ្នាំ២០២០នេះនៅត្រង់ចំណុចមុខរដ្ឋបាលព្រៃឈើភ្នំក្រហម ស្ថិតក្នុងភូមិរាជានុកូល សង្កាត់ក្រុងស្ទឹងត្រែង ។
ប្រភពនៅកន្លែងកើតហេតុការណ៍បានឱ្យដឹងថា រថយន្តមួយគ្រឿងម៉ាកម៉ុងតេរ៉ូ មានគ្នាជិះពី៤ ទៅ៥នាក់ មានទាំងក្មេងតូចៗទៀតផង បើកបរមកពីទិសខាងត្បូងទៅជើង មកដល់ចំណុចកើតហេតុ ក៏មានរថយន្តមួយគ្រឿងទៀត ម៉ាកស៊ាំងយ៉ុង បើកទិសបញ្ច្រាស់គ្នា។ ភ្លាមនោះ បានបុកពេញទំហឹង ដោយរថយន្តស៊ាំងយ៉ុងបើកបរមិនប្រកាន់ស្តាំ ជិះតែម្នាក់ឯង(មិនរងរបួសទេ)។ រថយន្តមួយទៀតអ្នកបើកបររថយន្តម៉ុងតេរ៉ូ បោកផ្ទប់នឹងចង្កូតចំទ្រូង និងប្រពន្ធរងរបួសជើង។
យោងតាមរបាយការណ៍របស់សមត្ថកិច្ចចរាចរណ៍ នៃស្នងការដ្ឋាននគរបាលខេត្តស្ទឹងត្រែង បានបង្ហាញថា រថយន្តបង្កម៉ាកសសាំងយ៉ុង ពណ៌ប្រផេះ ពាក់ស្លាកលេខ ភ្នំពេញ 2A -5116 ឈ្មោះ ទូច វ៉ា ភេទប្រុស អាយុ៣៥ឆ្នាំ ជនជាតិខ្មែរ រស់នៅភូមិដូនធី ឃុំបូសខ្នុរស្រុកចំការលើ ខេត្តកំពង់ចាម។
មុនកើតហេតុរថយន្តបង្ករខាងលើមកពីលក់ចន្ទី បំណងទៅផ្ទះវិញនៅឯខេត្តកំពង់ចាម។ ចំណែករថយន្តម៉ាកម៉ុងតេរ៉ូ ពណ៌ប្រផេះ ពាកស្លាកលេខភ្នំពេញ 2C- 3623 បើកបរដោយឈ្មោះ ស៊ឹម គ្រីយ៉ា ភេទប្រុស អាយុ៥៨ឆ្នាំ ជនជាតិខ្មែរឥស្លាម រស់នៅភូមិវិហារសម្បូរ ឃុំរការ៥ ខេត្តត្បូងឃ្មុំ ទិសដៅទៅខេត្តរតនគីរី (ទៅមើលចម្ការ)។
ក្រោយកើតហេតុ សមត្ថកិច្ចជំនាញបានយករថយន្តទាំងពីរ ទៅរក្សាទុកនៅកន្លែង រង់ចាំការដោះស្រាយពីម្ចាស់រថយន្តបង្កតាមផ្លូវច្បាប់។ រីឯអ្នករងរបួសជិះរថយន្តម៉ុងតេរ៉ូពីរនាក់ប្តីប្រពន្ធ ត្រូវក្រុមគ្រួសារដឹកបញ្ជូនទៅកាន់មន្ទីរពេទ្យបង្អែកខេត្តស្ទឹងត្រែង ដើម្បីព្យាបាល៕
