(ស្រុកព្រៃនប់)៖ បុរសម្នាក់បានស្លាប់ និងស្ត្រី២នាក់ទៀតរងរបួស ដោយគ្រោះថ្នាក់ច បុកគ្នា កាលពីម៉ោងជាង៩យប់ថ្ងៃទី១៨ ខែមេសា ឆ្នាំ២០២០ លើផ្លូវជាតិលេខ៤ ចន្លោះគីឡូម៉ែត្រ ១៩២-១៩៣ ស្ថិតនៅភូមិអូរតាប៉ាង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ។
សមត្ថកិច្ចបានប្រាប់ថា គ្រោះថ្នាក់ចរាចរណ៍នេះកើតឡើង រវាងរថយន្ត ០១គ្រឿងម៉ាក CRV ពណ៌សំបកឪឡឹក ពាក់ផ្លាកលេខភ្នំពេញ 2B-3851 បើកបរដោយឈ្មោះ យាន យ៉ុង ភេទប្រុស អាយុ៥០ឆ្នាំ មានទីលំនៅផ្ទះ ២៨សេ ផ្លូវ២៦៥ ភូមិ១៣ សង្កាត់ទឹកល្អក់៣ ខណ្ឌទួលគោក រាជធានីភ្នំពេញ មានអ្នករួមដំណើរចំនួន ០២នាក់ ឈ្មោះ ហង្ស ស្រីនិច ភេទស្រី អាយុ ២៣ឆ្នាំ មានទីលំនៅរាជធានីភ្នំពេញ និង ០១នាក់ទៀត ពុំទាន់ស្គាល់អត្តសញ្ញាណ ដែលមានទិសដៅពីភ្នំពេញ ឆ្ពោះមក ខេត្តព្រះសីហនុ លុះមកដល់ចំណុចខាងលើ រថយន្តនេះជ្រុលចូលទៅចំណែកផ្លូវម្ខាងទៀតរួចក៍បុករថយន្ត ០១គ្រឿងម៉ាក HYUNDAI ពណ៌ ស ពាក់ផ្លាកលេខភ្នំពេញ3A-3877 (ប្រភេទរថយន្តស៊ីទែនដឹកប្រេងឥន្ធនៈ) ដែលមានទិសដៅផ្ទុយគ្នា បើកបរដោយឈ្មោះ តន ម៉ាប់ ភេទប្រុស អាយុ ២០ឆ្នាំ មានទីលំនៅភូមិកោះស្លា ឃុំត្រពាំងឃ្លាំង ស្រុកឈូកខេត្តកំពត ។
គ្រោះថ្នាក់នេះបណ្តាលឱ្យស្លាប់មនុស្សចំនួន ០១នាក់ និងរបួសមនុស្សចំនួន ២នាក់ ៖ ១. ឈ្មោះ យាន យ៉ុង អ្នកបើកបររថយន្ត CRV ស្លាប់នៅនឹងកន្លែងកើតហេតុ។
២. ឈ្មោះ ហង្ស ស្រីនិច អ្នករួមដំណើរលើរថយន្ត CRV របួសមធ្យម។ ៣. អ្នករួមដំណើរលើរថយន្ត CRV មិនទាន់ស្គាល់អត្តសញ្ញាណ របួសមធ្យម ។
ក្រោយកើតហេតុអ្នករងរបួសបានបញ្ជូនទៅមន្ទីរពេទ្យ និងចាត់ចែងសាកសពទុកជូនក្រុមគ្រួសារ ចំណែកអ្នកបើកបររថយន្ត HYUNDAI នគរបាលបានឃាត់ខ្លួនបណ្តោះអាសន្ននាំមកសាកសួររួម និងវត្ថុតាង រថយន្តចំនួន ០២គ្រឿងយកមករក្សាទុកនៅអធិការដ្ឋាន នគរបាលស្រុកព្រៃនប់ ដោះស្រាយបន្ត៕
