(ខេត្តបាត់ដំបង) ៖ បុរសវ័យចំណាស់ ២នាក់ជិះម៉ូតូឌុបគ្នាបានបត់ ឆ្វេងដៃឆ្លងថ្នល់មិនទាន់ផងត្រូវរថយន្តក្រុងវីអាយភីរបស់ក្រុមហ៊ុនវីរៈប៊ុនថាំបុកចំពេញទំហឹង បណ្ដាលឲ្យបុរសម្នាក់ស្លាប់ ភ្លាមៗ និងម្នាក់ទៀតរងរបួសធ្ងន់។ ករណីគ្រោះថ្នាក់ចរាចរណ៍នេះបានកើតឡើង នៅវេលាម៉ោង ៩ ព្រឹក ថ្ងៃទី២៨ ខែកុម្ភៈ ឆ្នាំ២០២០ លើកំណាត់ផ្លូវជាតិលេខ៥ ត្រង់ចំណុច ភូមិសាលាត្រាវ ឃុំកំពង់ព្រៀង ស្រុកសង្កែ ខខេត្តបាត់ដំបង។
សមត្ថកិច្ចបានឱ្យដឹងថា នៅមុនពេលកើតហេតុ ម៉ូតូមួយគ្រឿង ម៉ាកឌ្រីម (ស្លាកលេខបាត់ ពេលរថយន្តបុកដាច់) បើកបរដោយឈ្មោះ យ៉ាត ស្មី ភេទប្រុស អាយុ៦៧ឆ្នាំ រស់នៅភូមិ ឃុឃុំកើតហេតុខាងលើ ជាអ្នកឌុបបានរងរបួសធ្ងន់ និងស្ត្រីអ្នករួមដំណើរម្នាក់ឈ្មោះ ម៉ក់ មេត អាយុ៦៣ឆ្នាំ(ស្លាប់) ធ្វើដំណើរក្នុងទិសដៅពីលិច ទៅកើត មកដល់ត្រង់ចំណុចខាងលើ ក៏ស្រាប់តែអ្នកបើកបរម៉ូតូ បានបត់ឆ្វេងឆ្លងផ្លូវ ជាចៃដន្យ ក៏មានរថយន្តក្រុងប្រភេទ VIP របស់ក្រុមហ៊ុន វីរៈប៊ុនថាំ ពាក់ស្លាកលេខ ភ្នំពេញ 2AD- 4369 ដែលកំពុងបោះពួយ មកពីក្រោយ ក៏បានបុកយ៉ាងពេញទំហឹង ធ្វើឲ្យម៉ូតូខ្ទាតធ្លាក់ចេញពីផ្លូវ ហើយរថយន្តក៏ធ្លាក់ដូចគ្នា។ ដោយឡែក អ្នកបើកបររថយន្តបានរត់គេចខ្លួនបាត់។
ក្រោយពេលកើតហេតុ សមត្ថកិច្ចបាននាំយក រថយន្ត និងម៉ូតូ ទៅរក្សាទុក ជាបណ្ដោះអាសន្ន ឯសពក៏បានប្រគល់ទៅឱ្យក្រុមគ្រួសារ ៕
