(ខេត្តបាត់ដំបង) ៖ ជនសង្ស័យចំនួន៣នាក់ ដែលជាមុខសញ្ញាជួញដូរថ្នាំញៀនដ៏ធំមួយ ត្រូវបានកម្លាំងកងរាជ អាវុធហត្ថស្រុកកំរៀង ធ្វើការបង្ក្រាបបានជាបន្តបន្ទាប់ ដោយក្នុងនោះមានទាំងថ្នាំញៀន មានទាំងលុយកាក់ និង គ្រឿង អលង្ការដ៏ច្រើនសន្ធឹកសន្ធាប់ថែមទៀតផង ដោយគេមិនទាន់ដឹងថា របស់មានតម្លៃទាំងនេះ ជនសង្ស័យបានមកពីណានោះទេ។
កម្លាំងមូលដ្ឋានកងរាជអាវុធហត្ថ បានចាប់ផ្តើមធ្វើឡើង កាលពីវេលាម៉ោង១និង៥០នាទីរសៀល ថ្ងៃទី១៧ ខែកុម្ភៈ ឆ្នាំ២០២០ នៅចំណុចមុខកាស៊ីណូឃ្វីន ក្នុងភូមិដូង ឃុំបឹងរាំង ស្រុកកំរៀង ខេត្តបាត់ដំបង ដោយនៅពេលនោះកម្លាំងចាប់ខ្លួនជនសង្ស័យបានម្នាក់ ឈ្មោះ កៃ លឿង ភេទប្រុស អាយុ៥៩ឆ្នាំ មុខរបរមិនប្រាកដ រស់នៅចំណុចខាងលើ។
នៅក្នុងកិច្ចប្រតិបត្តិការលើកទី១នេះ សមត្ថកិច្ចបានធ្វើការដកហូតវត្ថុតាងមួយចំនួនរួមមាន ៖ ១- ថ្នាំញៀនប្រភេទម៉ាទឹកកក ចំនួន២កញ្ចប់តូច ,២-ថ្នាំញៀនប្រភេទយ៉ាម៉ា ចំនួន២គ្រាប់កន្លះ។ ដោយទទួលបានការអនុញ្ញាតពីលោកព្រះរាជអាជ្ញាផង និង ទទួលបាននូវចម្លើយសារភាពផងនោះ គឺនៅវេលាម៉ោង២ និង៣០នាទីរសៀល ថ្ងៃដដែល កម្លាំងប៉េអិមស្រុក បានបន្តកិច្ចប្រតិបត្តិការជាលើកទី ២ ទៅកាន់ចំណុចភូមិដូង ឃុំបឹងរាំង ស្រុកកំរៀង។
នៅលើកទី២ នេះ កម្លាំងបានឃាត់ខ្លួនមេខ្លោង និង កូនប្រសា ព្រមទាំងអ្នកស្នាក់នៅជាមួយសរុបចំនួន៦នាក់ បន្ថែមទៀត ដែលពួកគេ គឺជាអ្នកជួញដូរយ៉ាងសកម្មជាទីបំផុត នៅក្នុងមូលដ្ឋាន គឺពួកគេមាន ១.ឈ្មោះ ម៉ី សារិន ហៅឌុង ភេទប្រុស អាយុ៥៩ឆ្នាំ រស់នៅចំណុចខាងលើ (មេខ្លោង) ,២. ឈ្មោះ ឆេង ភ័ត្រា ភេទប្រុស អាយុ៣០ឆ្នាំ (កូនប្រសា) , ៣.ឈ្មោះ ទេព វិឆៃ ភេទប្រុស អាយុ៣៤ឆ្នាំ ,៤.ឈ្មោះ សេង សុខា ភេទប្រុស អាយុ៣៣ឆ្នាំ ,៥.ឈ្មោះ ប៉ិក ពៀវ ភេទប្រុស អាយុ២៤ឆ្នាំ និង ៦. ឈ្មោះ សោម សុខគា ភេទប្រុស អាយុ២៨ឆ្នាំ។
រីឯវត្ថុតាងដែលដកហូតបានរួមមាន ៖ ១.ថ្នាំញៀនប្រភេទម៉ាទឹកកក ចំនួន៤៨កញ្ចប់ ទម្ងន់៨៦,៧៦ក្រាម ,២.ថ្នាំញៀនប្រភេទ យ៉ាម៉ា ចំនួន៦៩៣គ្រាប់ ៣.រថយន្តចំនួន០២គ្រឿង ម៉ាកហ្វត០១គ្រឿង និង ម៉ាកលុចស៊ិសRX300=០១គ្រឿង ,៤.ប្រាក់ដុល្លារចំនួន ២៤ ៥០៣ដុល្លារ ,៥.ប្រាក់បាតចំនួន ៨៣ ៩១០បាត ,៦.ប្រាក់រៀល ចំនួន ២៧ ៧១៧ ០០០រៀល , ៧. ខ្សែកលោហធាតុពណ៌លឿង១៣ខ្សែ ,៨.ខ្សែដៃលោហធាតុពណ៌លឿង១៣ខ្សែ ,៩. ខ្សែ ជើងលោហធាតុពណ៌លឿង០៤ខ្សែ ,១០.ចិញ្ចៀនលោហធាតុពណ៌លឿង១៣វង់,១១.កងដៃលោហធាតុពណ៌លឿង១០កង ,១២.បណ្តោងខ្សែកលោហធាតុពណ៌លឿង០៥បណ្តោង ,១៣.ជញ្ជីងថ្លឹងគ្រឿងញៀន០២គ្រឿង និង ១៤. ទូរសព្ទដៃ១០គ្រឿង។
បច្ចុប្បន្ន ប៉េអឹមស្រុក បានបញ្ជូនជនសង្ស័យទាំងនេះ រួមជាមួយនឹងវត្ថុតាង ទៅកាន់បញ្ជាការដ្ឋាន កងរាជអាវុធហត្ថខេត្តបាត់ដំបង ដើម្បីធ្វើការបន្តតាមនីតិវិធី៕
