(ខេត្តស្ទឹងត្រែង)៖ កូនប្រុសចៅសង្កាត់ម្នាក់បើករថយន្តបុកជាមួយម៉ូតូបណ្តាលឱ្យមន្ត្រីយោធាស្លាប់ទាំងពីរនាក់ឪពុកកូន។ហេតុការណ៍នោះបានកើតឡើងនៅលើកំណាត់ផ្លូវជាតិលេខ៧ត្រង់ភូមិសាស្ត្រភូមិខាំផាន់ សង្កាត់សាមគ្គី ក្រុងខេត្តស្ទឹងត្រែង កាលពីល្ងាចថ្ងៃទី២៤ ខែមករា ឆ្នាំ២០២០។
មន្ត្រីនគរបាលបាលប៉ុស្ត៍រដ្ឋបាលសង្កាត់សាមគ្គីបានឱ្យដឹងថាគ្រោះថ្នាក់ចរាចរណ៍នេះ គឺបង្កឡើងរវាងរថយន្តប្រភេទនីសាន់ ណាប្រា បើកបញ្ច្រាសទិសគ្នាបានបុកជាមួយម៉ូតូម៉ាកហុង ដាទ្រីមc125។ រថយន្ដមានទិសដៅពីជើងមកត្បូង បើកបរដោយឈ្មោះ ម៉ា លីស៊ីថូ ភេទប្រុស អាយុ៣៥ឆ្នាំត្រូវជាកូនលោកជាម៉ាលីចៅសង្កាត់សាមគ្គី។ រីឯជនរងគ្រោះបើកម៉ូតូឈ្មោះ វៀន ចំប៉ា ភេទប្រុសអាយុ២៥ឆ្នាំ ដឹកកូនប្រុស ទើបមានអាយុ៣ឆ្នាំ រស់នៅភូមិហាងខូបាន សង្កាត់សាមគ្គី ជនរងគ្រោះទាំងពីរនាក់ស្លាប់នៅកន្លែងកើតហេតុ។
មុនពេលជួបគ្រោះថ្នាក់ជនរងគ្រោះបម្រើក្រើការងារជាមន្ត្រីយោធាសឹករងស្រុកបុរីអូរស្វាយសែនជ័យ។ ម៉ូតូដែលជនរងគ្រោះជិះមានទិសដៅផ្ទុយគ្នាគឺធ្វើដំណើរតាមផ្លូវពីត្បូងទៅជើង បានបុកគ្នាបណ្តាលឱ្យស្លាប់ទាំងពីរនាក់ឪពុកកូនយ៉ាងអាណោចអាធ័ម។ អ្នកបើកបររថយន្តបានប្រាប់អ្នកសារព័ត៌មានតាមទូរស័ព្ទនៅក្រោយពេលកើតហេតុថាពេលខ្លួនជួបគ្រោះថ្នាក់ភ្លាមៗក៏បានចតរថយន្តហើយជួយលើកអ្នកបើកម៉ូតូដាក់ក្បែរចិញ្ចើមផ្លូវ។
បន្ទាប់មកក៏បានគេចចេញពីកន្លែងកើតហេតុតហេតុព្រោះខ្លាចមានអំពើហិង្សាកើតឡើង។ ចំពោះរថយន្តទុកឱ្យខាងនគរបាលដោះស្រាយ៕
