(ភ្នំពេញ)៖ លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡា រាជធានីភ្នំពេញ នៅថ្ងៃទី២០ ខែមករានេះ ដឹកនាំកិច្ចប្រជុំបន្ទាន់ស្ដីពីករណីបាតុភាព ទំនាស់ ហិង្សា ដែលបង្កដោយ យុវតី៤រូបមកពីវិទ្យាល័យហ៊ុនសែន ប៊ុនរ៉ានី ផ្សារដើមថ្កូវ និងសាលាទួនហ្វា ទៅ លើយុវតីមួយរូបនៅវិទ្យាល័យ ហ៊ុន សែន ប៊ុនរ៉ានី ផ្សារដើមថ្កូវ។
កិច្ចប្រជុំនេះបានប្រព្រឹត្តទៅក្នុងគោលបំណងណែនាំដល់អាណាព្យាបាល និងសិស្សបង្ក៖
-ទទួលស្គាល់កំហុសដែលខ្លួនបានប្រព្រឹត្ត
-សូមអភ័យទោសចំពោះសកម្មភាពដែលខ្លួនបានប្រព្រឹត្តកន្លងមក
-ប្ដេជ្ញាចិត្តមិនឱ្យសកម្មភាពនេះកើតឡើងជាថ្មី
-ធ្វើកិច្ចសន្យាជាលាយលក្ខណ៍អក្សរដើម្បីតម្កល់ទុកជាឯកសារ
សូមជម្រាបថាជាធម្មតាការដាក់ទណ្ឌកម្មទៅលើសិស្សានុសិស្សដែលប្រព្រឹត្តខុសពីបទបញ្ជាផ្ទៃក្នុងសាលាមានបីកម្រិត៖
១.ស្ដីបន្ទោសជាលាយលក្ខណ៍អក្សរ
២.ស្ដីបន្ទោសដោយចារលើសៀវភៅសិក្ខាគារិក
៣.បញ្ឈប់ការសិក្សា
ក្នុងឱកាសនៃកិច្ចប្រជុំនេះប្រធានមន្ទីររាជធានីភ្នំពេញបានទូន្មានដល់សិស្សបង្កទាំង ៤នាក់ និងសំណូមពរដល់អ្នកអាណាព្យាបាល៖
-បញ្ឈប់ការគុំកួនគ្នា និងបញ្ឈប់សកម្មភាពហិង្សាខ្វះសីលធម៌ល្មើសវិន័យ
-គោរពបទបញ្ជាផ្ទៃក្នុងសាលា និងខិតខំប្រឹងប្រែងរៀនសូត្រដើម្បីក្លាយជាធនធានមនុស្សមានប្រយោជន៍សម្រាប់សង្គម
-សូមអាណាព្យាបាលសិស្សជួយអប់រំណែនាំកូនបន្ថែមនៅក្រៅម៉ោងសិក្សា និងតាមដានការសិក្សាកូន
-អាណាព្យាបាលត្រូវសហការជាមួយសាលាពាក់ព័ន្ធនឹងការសិក្សារបស់សិស្ស
ដោយឡែកក្នុងឱកាសនោះផងដែរ អាណាព្យាបាល សិស្សបង្កក៏បានថ្លែងអំណរគុណដល់ថ្នាក់ដឹកនាំក្រសួង អភិបាលនៃគណៈអភិបាលរាជធានីភ្នំពេញ មន្ទីរ គណៈគ្រប់គ្រងសាលា ដែល បានយកចិត្តទុកដាក់ចំពោះករណីនេះ ព្រមទាំងសន្យាថានឹងធ្វើការណែនាំអប់រំកូនៗ ព្រមទាំងចូលរួមសហការជាមួយសាលាបញ្ឈប់សកម្មភាពដែលធ្លាប់កើតឡើងកន្លងមក។
ជាមួយគ្នានេះសិស្សបង្កទាំង៤នាក់ ក៏បានបង្ហាញការសោកស្ដាយចំពោះទង្វើដែលខ្លួនបានប្រព្រឹត្តកន្លងមកសន្យាថា មិនឱ្យសកម្មភាពនេះកើតឡើងជាថ្មីដោយខិតខំរៀនសូត្រធ្វើជាកូនល្អសិស្សល្អមិត្តល្អ។
ក្នុងឱកាសនោះផងដែរយុវសិស្សស្រ៊ុនកែវមរកតដែលជាជនរងគ្រោះនិងម្តាយបានលើកលែងទោសចំពោះសិស្សបង្កទាំង៤នាក់ មិនមានការគុំកួនបន្តនិងសំណូមពរសិស្សានុសិស្សទូទាំងប្រទេសមេត្តាកុំយកគំរូតាមដោយខិតខំរៀនសូត្រ និងសូមអាណាព្យាបាលទាំងអស់យកចិត្តទុកដាក់ចំពោះការសិក្សាកូនៗរបស់ខ្លួន៕
