(ភ្នំពេញ)៖ កាលពីថ្ងៃទី១៤ ខែមករា ឆ្នាំ២០២០ប្រជាពលរដ្ឋ ៣នាក់ ដែលអះអាងថា ជាតំណាងប្រជាពលរដ្ឋ ១៥០ គ្រួសារ នៅភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ បានដាក់ពាក្យបណ្តឹង ចូលតុលាការសាលាដំបូងខេត្តបន្ទាយមានជ័យ ប្តឹងពីបទផ្សំគំនិត ធ្វើមនុស្សឃាត និងប្រើអំពើហិង្សា។
តំណាងប្រជាពលរដ្ឋ បានប្តឹងចំឈ្មោះ លើមនុស្ស ៦នាក់ គឺ(ឯកឧត្តម អ៊ុំ រាត្រី) អភិបាលខេត្តបន្ទាយមានជ័យ (លោកជំទាវ ចក់ ពួក) អនុប្រធានសភាពាណិជ្ជកម្មបន្ទាយមានជ័យ ឋ(លោក យឿង គង់) អនុប្រធានសភាពាណិជ្ជកម្មបន្ទាយមានជ័យ (លោក ជា ផល្លី) ប្រធានរដ្ឋបាលព្រៃឈើ ខេត្តបន្ទាយមានជ័យ (លោក ព្រិម សាលី) ប្រធានពន្ធដារ ខេត្តបន្ទាយមានជ័យ និង (លោក បោន ប៊ុន) មេបញ្ជាការ កងរាជអាវុធហត្ថ ខេត្តបន្ទាយមានជ័យ។
ក្នុងពាក្យបណ្តឹង តំណាងប្រជាពលរដ្ឋ បានលើកឡើងថា កាលពីថ្ងៃទី២៦-២៧ ខែធ្នូ ឆ្នាំ២០១៩ ឯកឧត្តម អ៊ុំ រាត្រី អភិបាលខេត្ត បានដឹកនាំកម្លាំងប្រដាប់អាវុធជាច្រើននាក់ ទៅឈូសឆាយ ដករោង ផ្ទះ លំនៅឋានរបស់ពួកយើងខ្ញុំ ខ្ទេចខ្ទីអស់រលីងគ្មានសល់ ដល់ថ្ងៃទី២៨-២៩ ខែធ្នូ ឆ្នាំ២០១៩ ប្រជាពលរដ្ឋបានមកតវ៉ានៅមុខសាលាខេត្ត ម្បីឱ្ចៅហ្វាយខេត្ត ដោះស្រាយ ស្រាប់តែចៅហ្វាយខេត្ត ឃប់ឃិតគ្នាជាប្រព័ន្ធ យកប៉េអឹម មកចាប់ពួកយើងខ្ញុំ ៥នាក់ ថាជាមេខ្លោង នាំគ្នាទៅចាប់ដី ស្ថានីយព្រៃឈើតាបែនII នៅឃុំស្លាក្រាម ឃុំសឹង ស្រុកអូរជ្រៅ ស្រុកស្វាយចេក ខេត្តបន្ទាយមានជ័យ ហើយប្រើអំពើហិង្សា វាយធ្វើទារុណកម្មយ៉ាងធ្ងន់ធ្ងរ រហូតដល់ស្លាប់ម្នាក់ គឺឈ្មោះ (នុយ ស្រស់) ដល់ថ្ងៃទី៣១ ខែដដែល បានយកពួកយើង ទៅដាក់ក្នុងពន្ធនាគារខេត្ត ដល់ថ្ងៃទី០១ ខែមករា ឆ្នាំ២០២០ បបានយកទៅមន្ទីរពេទ្យមង្គលបុរី ដល់ថ្ងៃទី០៣ ខែមករា ឆ្នាំ២០២០ យកពួកខ្ញុំ ទៅក្រៅឃុំ ពួកយ៉ាងខ្ញុំ មានជំងឺពពីការវាយដំយ៉ាងធ្ងន់ធ្ងរ ខ្លះបាក់ធ្មេញ ខ្លះគ្រាំថ្លើម សួត ( ទារសងការខូចខាត និងជំងឺចិត្ត ២០០០០០ ដុល្លារ ( ម្លៃម៉ឺនដុល្លារ )។
សូមរម្លឹកថា ពាក្យបណ្តឹងរបស់តំណាងប្រជាពលរដ្ឋខាងលើនេះ បានធ្វើឡើង ខណៈដែលកាលពពីថ្ងៃទី១៤ ខែមករា ឆ្នាំ២០២០ ក្នុងពិធីជួបជុំជាមួយអ្នកសារព័ត៌មាន នៅកោះពេជ្រ ក្នុងរាជធានីភ្នំពេញ សម្តេចតេជោ ហ៊ុន សែន បានបញ្ជាឱ្យស៊ើបអង្កេតករណីអ្នកជាប់ឃុំម្នាក់បានស្លាប់ នៅខេត្តបន្ទាយមានជ័យ ដែលគេសង្ស័យថា រងការធ្វើទារុណកម្ម។
សម្តេចតេជោ ហ៊ុន សែន បានប្រកាសទុកជាមុនថាក្នុងករណីស្រាវជ្រាវរកឃើញថា ជនរងគ្រោះ ដែលស្លាប់នោះ ពិតជារងការធ្វើជារុណកម្មមែន នោះអ្នកប្រព្រឹត្ត នឹងមិនអាចអត់អោនបានឡើយ។ ពោលគឺជនបង្កដាច់ខាតត្រូវតែប្រឈមមុខច្បាប់ជាធរមាន។
ជុំវិញករណីនេះ សាលាខេត្តបន្ទាយមានជ័យ កាលពីថ្ងៃទី០១ ខែមករា ឆ្នាំ២០២០ បានចេញសេចក្តីបំភ្លឺ ដោយអះអាងថា ជនត្រូវចោទឈ្មោះ (ទុយ ស្រស់) បានស្លាប់នៅមន្ទីរពេទ្យមិត្តភាពកម្ពុជា ជប៉ុន មង្គលបូរី ដោយលទ្ធផលនៃការធ្វើកោសល្យវិច្ច័យរបស់ការិយាល័យបច្ចេកទេស និងវិទ្យាសាស្ត្រ នៃស្នងការដ្ឋាននគរបាលខេត្តបន្ទាយមានជ័យ និងតាមការបំភ្លឺពីជនជាប់ចោទ ចំនួន ០៤នាក់ ដែលមានសំណុំរឿងតែមួយជាមួយគ្នា បានអះអាងដូចគ្នា និងបានសន្និដ្ឋានថា ជនរងគ្រោះ ឈ្មោះ (ទុយ ស្រស់) ( សាកសព ) មានសភាពមិនប្រក្រតី មានសុខភាពមិនល្អ និងញៀនស្រា ដាច់មិនបាន ហើយមុនពេលស្លាប់ ក្រុមមន្ត្រីពន្ធនាគារខេត្ត និងក្រុមគ្រួសារជនរងគ្រោះ ( សាកសព ) បានយកចិត្តទុកដាក់ជាខ្លាំង ដោយបានបញ្ជូនយកទៅព្យាបាលនៅមន្ទីរពេទ្យមិត្តភាពកម្ពុជា ជប៉ុន មង្គលបូរី ប៉ុន្តែមិនអាចជួយសង្គ្រោះបានទាន់ពេលវេលា។
ប្រកាសរបស់សាលាខេត្តបន្ទាយមានជ័យ បន្ថែមថា ក្រោយការពិនិត្យរបស់មន្ត្រីជំនាញ និងលោកគ្រូពេទ្យយ៉ាងល្អិតល្អន់រួចមក សាកសពត្រូវបានប្រគល់ជូនឈ្មោះ ទុយ ធឿន ត្រូវជាឪពុកបង្កើត និងប្រពន្ធរបស់សាកសព ឈ្មោះ ប៊ុយ គឹមឡាក់ ទទួលយកទៅធ្វើបុណ្យតាមប្រពៃណី ស្ថិតនៅភូមិជ្រៃ ឃុំចង្ហា ស្រុកអូរជ្រៅ ខេត្តបន្ទាយមានជ័យ។
យ៉ាងណាក៏ដោយ ករណីនេះ ក្រុមគ្រួសារជនរងគ្រោះ មិនអស់ចិត្ត ហើយបានយំទាមទាររកយុត្តិធម៌ ដោយនៅតែអះអាងថា (លោក ទុយ ស្រស់) ស្លាប់ដោយសារតែការវាយធ្វើទារុណកម្ម ក្នុងអំឡុងពេលប៉េអឹម ចាប់យកទៅឃុំឃាំង៕
