(ភ្នំពេញ)៖ ប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែន បានលើកឡើងថាទំហំពាណិជ្ជកម្មរវាងកម្ពុជានិងវៀតណាមមិនមែនក្រោម ៥០០០លានដុល្លារនោះទេគឺលើស៥០០០លានដុល្លារ ដោយសារតែការនាំចេញស្រូវទៅវៀតណាមហើយវៀត ណាមកត់ត្រាជាផ្លូវការដែលកត់ត្រាក្នុងជើងលេខគយគឺមានត្រឹម៣០ម៉ឺនតោនទេ ប៉ុន្តែជាក់ស្តែងវៀតណាមមកទិញស្រូវពីកម្ពុជារហូតដល់ជាង ២ លានតោន ។
ប្រមុខរាជរដ្ឋាភិបាលបានថ្លែងបែបនេះនៅក្នុងពិធីចែកសញ្ញាបត្រដល់និស្សិតសាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ច ចំនួនជិត ៣ពាន់នាក់នា ព្រឹកថ្ងៃទី ២៦ ខែធ្នូ ឆ្នាំ ២០១៩ ។
សម្តេចតេជោនាយករដ្ឋមន្ត្រីបានមានប្រសាសន៍ថា៖ ក្នុងឆ្នាំនេះកម្ពុជានាំចេញអង្ករទៅក្រៅប្រទេសបានប្រមាណជាងកន្លះលានតោន ។ ក៏ប៉ុន្តែតួលេខមិនផ្លូវការ ដែលប្រជាកសិកររបស់យើងបានលក់ទៅឱ្យប្រទេសជិតខាងគឺមានទំហំធំ គ្រាន់តែលក់ស្រូវទៅឱ្យវៀតណាមមានរហូតជាង ២ លានតោន ។
សម្តេចតេជោបន្តថា៖ «អ៊ីចឹងហើយបានជាខ្ញុំថាទំហំពាណិជ្ជកម្មរវាងកម្ពុជានិងវៀត ណាមវាមិនមែនឋិតនៅក្រោម៥ពាន់លានដុល្លារទេ វាស្ថិតនៅលើស៥ពាន់លានដុល្លារដោ យសារយើងនាំចេញទៅវៀតណាមដែលវៀតណាមចេញជាផ្លូវការដែលកត់ត្រាក្នុងជើងលេខគយគឺចំនួនតែ៣0ម៉ឺនតោនទេ។ប៉ុន្តែខាងវៀតណាមមកទិញគឺមានប្រមាណជា២ លានតោនជាស្រូវ» ។
សម្តេចតេជោនាយករដ្ឋមន្ត្រីបានធ្វើការពន្យល់អំពីមូលហេតុដែលប្រជាកសិករលក់ស្រូវទៅក្រៅប្រទេសច្រើនគឺដោយសារតែកម្ពុជានៅខ្វះមធ្យោបាយក្នុងការស្តុក ខ្វះឡសំងួត និង ម៉ាស៊ីនកិនស្រូវ។ចំណុចនេះវាដូចជាយើងមានមាសខ្វះក្រដាសខ្ចប់ ។ គោលនយោ បាយរបស់យើងដាក់ចេញជំរុញផលិតកម្មស្រូវនិងការ នាំចេញអង្ករឱ្យបាន១លានតោន។ អ៊ីចឹងគោលដៅទាំងពីររបស់យើងនេះសម្រេចបានតែគោលដៅមួយទេគឺយើងធ្វើឱ្យសល់ស្រូវជិត៦លានតោន។តែការនាំចេញរបស់យើងអត់ដែលនាំចេញបាន១លានតោននោះទេ។
សម្តេចបានល់កជាសំណួរថាអញ្ចឹងស្រូវដែលនៅសល់យកទៅណានេះជាសំណួររបស់យើង។ ស្រូវដែលនៅសល់គឺលក់ទៅវៀតណាម ៧០ ភាគរយនិងលក់ទៅ ថៃ ៣0 ភាគរយ ។ សម្តេចបន្តថាហេតុដូច្នេះហើយបានជាឥឡូវនេះយើងកំពុងតែខិតខំទាញវិនិយោគដើម្បីឱ្យមកវិនិយោគក្នុងស្រុកតែម្ដង កន្លងទៅនេះខ្វះឡ សម្ងួត ខ្វះម៉ាស៊ីនកិនស្រូវ ខ្វះឃ្លាំង អញ្ចឹងទេជម្រើសដែលនៅសល់គឺលក់ទៅឱ្យប្រទេសជិតខាង ។
សម្តេចតេជោនាយករដ្ឋមន្ត្រីក៏បានរំលឹកឡើងវិញថា៖«មានពេលមួយនោះអតីតនាយករដ្ឋមន្ត្រីវៀតណាម ង្វៀន តាន់យុងគាត់បាននិយាយមកកាន់ខ្ញុំថាអរគុណសម្តេចដែលកម្ពុ ជាជួយលក់ស្រូវឱ្យវៀតណាមដល់ជាង១លានតោន ។ ខ្ញុំព្រះករុណាខ្ញុំក៏ឆ្លើយតបទៅវិញថាអរគុណឯកឧត្តមដែលបានជួយទិញស្រូវពីកម្ពុជាជាង ១ លានតោនដោយមិនបាច់បង់ពន្ធចូលប្រទេសវៀតណាម » ។
បើតាមរដ្ឋមន្ត្រីក្រសួងកសិកម្ម រុក្ខាប្រម៉ាញ់ និង នេសាទ កម្ពុជាបានលក់ស្រូវទៅឲ្យវៀតណាមក្រៅផ្លូវការមានចំនួនប្រមាណ ២,២៥ លានតោននៅក្នុងឆ្នាំ ២០១៩ នេះ ៕
