(ភ្នំពេញ)៖ រថយន្តកុងតឺន័រ បើកបុករថយន្តស្ទួចដែលចតអែបចិញ្ចើមផ្លូវ បណ្ដាលឱ្យរងការខូចខាតយ៉ាងដំណំ តែសំតែសំណងល្អមិនបណ្ដាលឱ្យអ្នកបើកបរនិងអ្នករួមដំណើររងរបួស។ ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង១២ និង១០នាទី រំលងអធ្រាត្រ ឈានចូលថ្ងៃទី២៧ ខែវិច្ឆិកា ឆ្នាំ២០១៩ ក្បែរអតីតលូប្រាំ តាមបណ្ដោយផ្លូវវេងស្រេង ក្នុងសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។
សមត្ថកិច្ចបានឲ្យដឹងថា រថយន្តស្ទួចធុនធំ ពណ៌ក្រហម ពាក់ផ្លាកលេខភ្នំពេញ 5A- 1459 ធ្វើដំណើរតាមបណ្ដោយផ្លូវវេងស្រេង ទិសដៅពីកើតមកលិច ខណៈមកដល់ចំណុចកើតហេតុក៏បានអែបរថយន្តមកចិញ្ចើមផ្លូវ រួចដើរទៅហូបបាយដោយមិនបានដាក់ផ្លាកសញ្ញា។ បន្ទាប់មកក៏មានរថយន្តកុងតឺន័រ ពណ៌ខៀវ ពាក់ផ្លាកលេខភ្នំពេញ 3E-7970 បានបើកបរមកពីក្រោយដោយសង្ស័យតែអ្នកបើកបរងងុយដេក ក៏ជ្រុលចង្កូតមកបុករថយន្តស្ទួចពីក្រោយពេញទំហឹង បណ្ដាលឱ្យក្បាលរថយន្តកុងតឺន័រផ្នែកខាងស្ដាំរងការខូចខាតយ៉ាងដំណំ ។ ចំណែករថយន្តស្ទួចខូចខាតតិចតួចដោយសារកាងរថយន្តដែកក្រាស់។
ក្នុងហេតុគ្រោះថ្នាក់ចរាចរណ៍ខាងលើនេះលើនេះ មិនមានអ្នកណាម្នាក់រងរបួសនោះទេ ហើយភ្លាមៗភាគីទាំងសងខាងក៏បានសម្របសម្រួលគ្នាដែរ តែដោយសារភាគីទាំង២ជជែករកតែត្រូវរៀងៗខ្លួន ទើបដោះស្រាយមិនចេញ ។ ក្រោយមកសមត្ថកិច្ចមូលដ្ឋានបានចុះទៅដល់ រួចទាក់ទងទៅជំនាញចរាចរណ៍ឱ្យមកធ្វើការវាស់វែងយករថយន្តទាំង២គ្រឿងទៅរក្សាទុកនៅការិយាល័យចរាចរជើងគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយតាមក្រោយ៕
