(ខេត្តមណ្ឌលគិរី)៖ ប្រជាពលរដ្ឋរស់នៅភូមិអូរអាមរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី បានរាយការណ៍ឱ្យដឹងថា នៅក្នុងមូលដ្ឋានរស់នៅរបសើពួកគាត់ មានឃ្លាំងស្តុកឈើដ៏ធំមួយស្ថិតតាមបណ្ដោយផ្លូវទៅច្រកទ្វេភាគីឡាប៉ាខេ ហើយមិនដែលឃើញមន្ត្រីជំនាញ និងសមត្ថកិច្ចពាក់ព័ន្ធចុះទៅត្រួតពិនិត្យឡើយ។ ឈើទាំងនេះឈ្មួញបានដឹកជញ្ជូនទៅប្រទេសវៀតណាមតាមច្រកទ្វេភាគីឡាប៉ាខេ យ៉ាងរលូនដោយគ្មានការទប់ស្កាត់ឡើយ។ ករណីនេះកំពុងធ្វើឱ្យបទ បញ្ជារបស់លោក សា្វយ សំអ៊ាង អភិបាលខេត្តមណ្ឌលគិរី ក្នុងការបង្ក្រាប និងទប់ស្កាត់បទល្មើសព្រៃឈើក្លាយជារឿងឥតន័យ។
បច្ចុប្បន្ននេះឈ្មួញមួយចំនួនបន្តប្រមូលទិញឈើស្តុកទុកក្នុងស្រុកកែវសីមា ហើយដឹកជញ្ជូនទៅស្រុកយួនតាមច្រកទ្វេភាគីឡាប៉ាខេ យ៉ាងរលូន។ ចំណែកប្រធានមន្ទីរកសិកម្មខេត្តមណ្ឌលគិរី លោក សុង ឃាង ក៏ដូចជានាយខណ្ឌរដ្ឋបាលព្រៃឈើខេត្តមណ្ឌលគិរី លោក អ៊ុំ វណ្ណសុភគ៌ បានរក្សាភាពស្ងៀមស្ងាត់សម្ងំទទួលផលប្រយោជន៍ពីក្រុមឈ្មួញយ៉ាងសុខស្រួល ហេតុដូច្នេះហើយទើបបទល្មើសព្រៃឈើកើតរាលដាលគ្មានការថនថយ។ ចំណែកលោកវេង សុខុន រដ្ឋមន្ត្រីក្រសួក្រសួងកសិកម្មក៏មិនដែលឃើញឈឺឆ្អាលរឿងការកាប់ឈើខុសច្បាប់នាំចេញទៅប្រទេសវៀតណាមដែរ។
សេចក្តីរាយការណ៍បានបន្តឱ្យដឹងទៀតថា កាលពីយប់ថ្ងៃទី២១ ខែមិថុនា កន្លងទៅថ្មីៗនេះ មានរថយន្តប្រភេទវ៉េអង៣គ្រឿង ដឹកជញ្ជូនឈើពីទីតាំងក្រុមហ៊ុនយ៉ាងចាវ ដែលនៅក្នុងស្រុកកោះញែក ខេត្តមណ្ឌលគិរី មកស្តុកទុកនៅឃ្លាំងភូមិអូរអាម ឃុំស្រែខ្ទុម ស្រុកកែវសីមា។ ប្រភពបានឱ្យដឹងទៀតថា ក្រុមឈ្មួញដឹកឈើសំអាងមានលិខិតអនុញ្ញាត ប៉ុន្តែការពិតឈើនៅក្នុងរថយន្តប្រភេទវ៉េអងទាំង៣គ្រឿងនោះជាឈើឃ្លុំ គគីរ សុក្រំ និងស្រឡៅ ដែលមានមុខកាត់០,៣០ម៉ែត្រគុណនឹង០,៣០ម៉ែត្រឡើងទៅ។
សេចក្ដីរាយការណ៍ពីមន្ត្រីអាជ្ញាធរ និងសមត្ថកិច្ចមូលដ្ឋានបានលើកឡើងថា ទីតាំងស្តុកឈើនោះដំណើរការជាយូរមកហើយមិនដែលឃើញមន្ត្រីជំនាញឬសមត្ថកិច្ចពាក់ព័ន្ធចុះត្រួតពិនិត្យទាល់តែសោះ ហើយពេលដឹកជញ្ជូនឈើចូលម្ដងៗតែងធ្វើតាមរបៀបលាក់បាំង និងយាមកាមតឹងរឹងមិនឱ្យអ្នកសារព័ត៌មានចូលថតរូបភាពទេ។ ក្រៅពីនោះមន្ត្រីក្នុងមូលដ្ឋានក៏មិនហ៊ានក្អកដែរ។ លើសនេះទៅទៀតមន្ត្រីរដ្ឋបាលព្រៃឈើនិងើនិងងមន្ត្រីបរិស្ថានក្នុងស្រុកកែវសីមា គិតតែពីរឿងប្រមូលលុយដាក់ហោប៉ៅយ៉ាងសុខស្រួល ហើយបណ្ដោយឱ្យបទល្មើសព្រៃឈើរាលដាលកាន់តែខ្លាំងក្លាលើសមុនទៅទៀត។
មន្ត្រីអង្គការក្រៅរដ្ឋាភិបាល និងសកម្មជនព្រៃឈើក្នុងខេត្តមណ្ឌលគិរី បានឱ្យដឹងថា បច្ចុប្បន្នព្រៃឈើក្នុងស្រុកកោះញែក កំពុងប្រឈមនឹងសេចក្ដីវិនាសចៀសមិនផុតឡើយ ព្រោះឈ្មួញធំៗនៅតែបន្តកាប់ឈើដឹកជញ្ជូនឈើចេញពីស្រុកកោះញែក យ៉ាងគគ្រឹកគគ្រេងគ្មានញញើតអ្វីទាំងអស់ និងគ្មានស្ថាប័នជំនាញណាមួយបថ្កហរាបឡើយ។ ទក់ទិននឹងសេចក្តីរាយការណ៍ខាងលើនេះ គេហទំព័ ខ្មែរអង្គរ កំពុងស្វែងរកសុំការបំភ្លឺពីអ្នកពាក់ព័ន្ធមនទាន់បាននៅឡើយទេ៕
