(ភ្នំពេញ)៖ សារព័ត៌មានដែលមានមូលដ្ឋាននៅក្រៅប្រទេស បានផ្សាយថាមានការឃុបឃិតជាមួយសមត្ថកិច្ចជំនាញប្រព្រឹត្តបទល្មើសលួចកាប់ឈើពីតំបន់ព្រៃឡង់ដឹកចូលក្រុមហ៊ុនបន្លំជាឈើស្របច្បាប់។
ពាក់ព័ន្ធករណីខាងលើនេះនេះក្រសួងកសិកម្មរុក្ខាប្រមាញ់ និងនេសាទនៅថ្ងៃទី ៤ ខែមិថុនាឆ្នាំ ២០១៩ នេះ គឺបានចេញសេចក្តី ប្រកាសព័ត៌មានបន្ទាន់មួយដើម្បីឆ្លើយតបទៅនឹងការចោទប្រកាន់ខាងលើ។ ក្រសួងកសិកម្មបានលើកឡើងថា បន្ទាប់ពីបានចុះពិនិត្យផ្ទៀងផ្ទាត់ជាក់ស្ដែងរួចមកមន្ទីរកសិកម្មរុក្ខាប្រមាញ់ និងនេសាទខេត្តក្រចេះ សូមធ្វើការបដិសេធទាំងស្រុងនូវខ្លឹមសារផ្សព្វ ផ្សាយរបស់បណ្តាញសារព័ត៌មានដែលមានការប្រាសចាកការពិតទាំងស្រុងពីសកម្មភាពអនុវត្តជាក់ស្ដែងរបស់សមត្ថកិច្ចជំនាញ និងក្រុមហ៊ុនស៊ីងបាយអូថេក។
មន្ទីរកសិកម្មរុក្ខាប្រមាញ់ និងនេសាទ ខេត្តក្រចេះយល់ឃើញថា ខ្លឹមសារដែលបានផ្សាយមកនេះគឺមានចរិតចេតនានោះខ្ញុំសាធារណៈមតិឲ្យមានការយល់ច្រឡំចំពោះគោលនយោបាយរបស់រាជរដ្ឋាភិបាលកម្ពុជាដែលជានិច្ចកាលគ្រប់កាលៈទេសៈមន្ត្រីជំនាញរបស់រដ្ឋតែងតែខិតខំបំពេញភារកិច្ចស្នូលប្រកបដោយភាពទទួលខុសត្រូវខ្ពស់។
ជាថ្មីម្ដងទៀតមន្ទីរកសិកម្មរុក្ខាប្រមាញ់និងនេសាទខេត្តក្រចេះសូមធ្វើការបដិសេធទាំងស្រុងនូវព័ត៌មានដែលផ្សព្វផ្សាយដោយសារព័ត៌មានក្រៅប្រទេសគឺជាព័ត៌មានមិនពិតនិងបំភ្លើសព័ត៌មានទាំងស្រុង។
*សូមរំឭកថា នៅយប់ថ្ងៃទី៣១ ខែឧសភា ឆ្នាំ២០១៩ វិទ្យុអាស៊ីសេរី បានផ្សាយករណីខាងលើនេះយ៉ាងដូច្នេះ ៖
“អាជ្ញាធររងការចោទថា មានចេតនាបណ្ដោយឱ្យមានអាជីវកម្មឈើខ្នាតធំនៅជាប់តំបន់ព្រៃឡង់”
ពលរដ្ឋរស់នៅឃុំបឹងចារ និងឃុំកំពង់ចាម ស្រុកសំបូរ ខេត្តក្រចេះ អះអាងថា អាជ្ញាធរមានចេតនា បណ្ដោយឱ្យមានអាជីវកម្មឈើខ្នាតធំ នៅជាប់តំបន់ព្រៃឡង់ ខេត្តក្រចេះ និងខេត្តស្ទឹងត្រែង ក្រោមលេសថា ប្រមូលឈើចេញពីក្នុងបរិវេណផ្ទៃដីសម្បទានសេដ្ឋកិច្ចស៊ីបាយអូថេក (Ci-Biotech Co., Ltd)។ អ្នកភូមិថា ឈើមូលធំៗ ឋិតក្នុងដែនជម្រកសត្វព្រៃឡង់ នៅតែទទួលរងការកាប់ដួល ដឹកជញ្ជូនចូលការដ្ឋានក្រុមហ៊ុន យ៉ាងគគ្រឹកគគ្រេង ដោយគ្មានការស៊ើបអង្កេត។
ពលរដ្ឋរស់នៅឃុំកំពង់ចាម និងឃុំបឹងចារ ស្រុកសំបូរ អំពាវនាវជាថ្មីទៀត ឱ្យក្រសួងកសិកម្ម និងក្រសួងបរិស្ថាន ស៊ើបអង្កេតពីភាពមិនប្រក្រតីនៃការប្រមូលឈើខុសច្បាប់ចេញពីព្រៃអភិរក្ស បង្កឡើងដោយក្រុមហ៊ុន ស៊ីបាយអូថេក។ ការអំពាវនាវនេះ ក្រោយពីអ្នកភូមិចុះល្បាតព្រៃ កាលពីចុងសប្ដាហ៍មុន ប្រទះឃើញក្បូនរថយន្តប៉ាកុង ឬអារ៉េវ ដឹកជញ្ជូនឈើមូលធំៗ ចេញពីដែនជម្រកសត្វព្រៃព្រៃឡង់នៅចំណុច អូរគ្រាក់ និងចំណុចឈើទាលធំ បំណងចូលក្នុងការដ្ឋានអារឈើរបស់ក្រុមហ៊ុននេះស៊ីបាយអូថេក។
ពលរដ្ឋរស់នៅឃុំកំពង់ចាម លោក ណាំ ណាក់ សង្កេតឃើញថា ដើមឈើមានមុខកាត់ចាប់ពី ១តឹកឡើងទៅ ត្រូវបានកម្មករក្រុមហ៊ុនកាប់ដឹកជញ្ជូនចូលរោងចក្រ រួចអារច្រៀកជាបន្ទះក្ដារ ដើម្បីដឹកជញ្ជូនចេញក្រៅតាមរថយន្តយីឌុប។ លោកថា នៅចំណុចដំបូកសរ ក្នុងឃុំបឹងចារ មានរោងចក្រអារឈើ ៤កន្លែង កំពុងធ្វើសកម្មភាពអារច្រៀកឈើ។ ទន្ទឹងនេះ ដើមច្បោះជ័រអ្នកស្រុកឋិតក្នុងតំបន់ព្រៃឡង់ នៅតែបន្តបាត់បង់ ជាបន្តបន្ទាប់ ដោយសារកម្មករក្រុមហ៊ុនលួចកាប់ ដោយគ្មានការទទួលខុសត្រូវ៖ «ទីមួយគេកាប់បំផ្លាញដើមច្បោះជ័រពលរដ្ឋហ្នឹង និងទី២ តំបន់ព្រៃឡង់មួយជូរឈើទាលធំ និងបុស្សខ្នោ ក្នុងប្លុកក្រុមហ៊ុនខ្លះដែរ គេអារធ្វើជាក្ដារ គេដឹកចូលដេប៉ូរួចហើយ ហើយខាងដេប៉ូគេដឹកចូលរោងចក្រ។ គេច្រៀកក្តាររួច ដឹកដាក់កុងទឺន័រដឹកចេញក្ដៅ»។
សេចក្ដីរាយការណ៍ពីសហគមន៍ព្រៃឡង់ ឱ្យដឹងថា បើទោះបីជាពួកគេ រាយការណ៍ពីភាពមិនប្រក្រតី នៃអាជីវកម្មឈើនេះ ដោយមានភ្ជាប់រូបថតជាភស្តុតាងជាយូរមកហើយ មកទល់ពេលនេះ ពុំឃើញមានស្ថាប័នណា ចេញមុខបង្ក្រាប និងទប់ស្កាត់នោះទេ ផ្ទុយទៅវិញក្រុមហ៊ុននៅតែប្រមូលឈើទ្រង់ទ្រាយធំដដែលៗ។
ពលរដ្ឋរស់នៅឃុំបឹងចារ ថ្លែងសុំលាក់ឈ្មោះ ឱ្យដឹងថា មន្ត្រីរដ្ឋបាលព្រៃឈើដែលប្រចាំការនៅទីនោះបានឃុបឃិតជាមួយក្រុមហ៊ុន បម្លែងឈើដែលកាប់ចេញពីព្រៃអភិរក្សជាឈើស្របច្បាប់។លោកបញ្ជាក់ថា នៅគ្រាដែលកម្មករក្រុមហ៊ុនលើកឈើដាក់ឡានគ្រប់ចំនួន មេព្រៃឬហៅថា មន្ត្រីរដ្ឋបាលព្រៃឈើ បានទៅយកលុយពីក្រុមហ៊ុន ជាថ្នូរអនុញ្ញាតឱ្យនាំឈើចេញ អះអាងថា មានលិខិតអនុញ្ញាត ឬហៅថា ប៉េ សេ PC៖ «តាំងពីមន្ត្រីបរិស្ថាន និងមេព្រៃដើរយកតែលុយ ដឹកតាមក្រឡេថង រៀបចំឈើអីចឹងទៅ ហៅមេព្រៃទៅវ៉ៃត្រា ទៅត្រួតពិនិត្យ ឡានដឹកឈើរួចដឹកចេញ។ មេព្រៃឥឡូវគេដើរធ្វើអីចឹងវិញ។ ក្រុមហ៊ុនរៀបឈើដាក់ឡាន ចាំក្រុមហ៊ុនហៅទៅយកលុយ រៀបក្នុងឡានត្រូវបច្ចេកទេស មេព្រៃឱ្យចេញបានបានចេញ»។
ក្រុមហ៊ុន ស៊ីបាយអូថេច វិនិយោគដំណាំឧស្សាហកម្ម អាកាស្យា ឬស្ថានីយស្ដារព្រៃឈើឡើងវិញ ដែលវិនិយោគលើផ្ទៃដីចំនួនជាង ៣ម៉ឺនហិកតារ (៣៤.០០៧) កាលពីខែមិថុនា ឆ្នាំ ២០១២ ឋិតនៅក្នុងស្រុកសំបូរ ខេត្តក្រចេះ និងមួយផ្នែកចូលដីស្រុកសៀមបូក ខេត្តស្ទឹងត្រែង។
អាស៊ីសេរីនៅមិនទាន់អាចសុំបានការបកស្រាយបញ្ហានេះ ពីអ្នកនាំពាក្យក្រសួងកសិកម្ម លោក ស្រី វុឌ្ឍី នៅឡើយទេនៅថ្ងៃទី៣១ ឧសភា ព្រោះទូរស័ព្ទហៅចូល គ្មានអ្នកទទួល។
អ្នកនាំពាក្យគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ លោក អេង ហ៊ី ប្រាប់អាស៊ីសេរីនៅថ្ងៃទី៣១ ឧសភាថា ពលរដ្ឋដែលប្រទះឃើញបទល្មើសព្រៃឈើ ត្រូវរាយការណ៍ទៅអាជ្ញាធរដែនដី ឬអាជ្ញាធរខេត្តសាមីជាមុនសិន តែប្រសិនបើខេត្តមិនចាត់វិធានទេលោកនឹងអន្តរាគមន៍រឿងនេះ។ ទោះជាយ៉ាងណា កន្លងមកប្រជាសហគមន៍ឃ្លាំមើលបទល្មើសព្រៃឈើបានរាយការណ៍ទៅអាជ្ញាធរមូលដ្ឋានជាហូរហែរួចទៅហើយ ហើយសារព័ត៌មានក៏បានរាយការណ៍ជាបន្តបន្ទាប់អំពីឧក្រិដ្ឋកម្មព្រៃឈើនេះ ប៉ុន្តែមិនឃើញមានការបង្ក្រាបគួរយកជាការបានឡើយ។ ស្របពេលគ្នានេះ គេឃើញតែរដ្ឋាភិបាលបង្កើតគគណៈកម្មការនេះ ឬអាជ្ញាធរនោះ ដូចជាគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ ដែលមានលោក សៅ សុខា ជាឧទាហរណ៍។ លើសពីនេះ គេសង្កេតឃើញអាជ្ញាធរពាក់ព័ន្ធនឹងការងាររក្សាការពារធនធម្មជាតិទាំងអស់នេះរុញដាក់គ្នា ជាជាងសហការគ្នាដើម្បីបំបាត់ភាពអសកម្ម ឬដោះស្រាយចំណុចខ្វះខាតរបស់ខ្លួន។
អ្នកនាំពាក្យក្រសួងបរិស្ថាន លោក នេត្រ ភត្ត្រា ឱ្យដឹងកាលពីថ្ងៃទី២៩ ឧសភា ថា ការផ្តល់អាជ្ញាប័ណ្ណវិនិយោគដីសម្បទានសេដ្ឋកិច្ច ជាភារកិច្ចរបស់ក្រសួងកសិកម្ម៖ «ជាការពិតតំបន់ព្រៃឡង់មានទំហំជាង ៤៣ម៉ឺនហិកតារ មានទំហំធំ ពេលខ្លះយើងមានការខ្វះចន្លោះ ដូច្នេះហើយយើងបង្កើនសកម្មភាពល្បាត និងអំពាវនាវម្តងហើយម្ដងទៀតឱ្យបងប្អូនពលរដ្ឋមានការចូលរួម ជាមួយកម្លាំងឧទ្យានុរក្ស និងអាជ្ញាធរមូលដ្ឋាន បង្ក្រាបព្រៃឈើដែលកើតមាននេះ»។
ចំពោះក្រុមហ៊ុនស៊ីបាយអូថេក(Ci-Biotech Co., Ltd) មន្ត្រីពង្រឹងសិទ្ធិអំណាចសហគមន៍ នៃសមាគមអាដហុក លោក ប៉ែន ប៊ុណ្ណារ៍ ចាត់ទុកការអនុញ្ញាតឱ្យបើកការដ្ឋានអារឈើធំៗនៅជាប់ព្រៃឡង់ ផ្ទុយពីបទបញ្ជាថ្នាក់ដឹកនាំរដ្ឋ និងក្រសួងបរិស្ថាន ដែលជំរុញឱ្យស្ថាប័នពាក់ព័ន្ធរួមគ្នាការពារព្រៃឈើ និងជីវចម្រុះដែលនៅសេសសល់។ លោកថា រដ្ឋាភិបាលគួរតែលុបអាជ្ញាប័ណ្ណក្រុមហ៊ុននេះ ព្រោះការផ្តល់ទីតាំងប្រមូលឈើជាប់ព្រៃការពារធម្មជាតិ គឺជាមូលហេតុនាំឱ្យបាត់បង់ព្រៃឈើ និងជាបទល្មើសឧក្រិដ្ឋ៖ «អ្នកដឹកនាំរដ្ឋ ប្ដេជ្ញាបង្ក្រាបបទល្មើសព្រៃឈើ បើមានឆន្ទៈអីចឹងមែនយើងទាមទារសូមឱ្យសាមីក្រសួងចេញលិខិតអនុញ្ញាតលុបចោល ដើម្បីរក្សាព្រៃឈើ ព្រោះកុំសង្ឃឹមការដាំដើមឈើឡើងវិញ»។
កាលពីថ្ងៃទី១២ ខែធ្នូ ឆ្នាំ ២០១៨ រដ្ឋមន្ត្រីក្រសួងកសិកម្ម លោក វេង សាខុន បានចុះហត្ថលេខាអនុញ្ញាតប្ដូរទីតាំងរោងម៉ាស៊ីនកែច្នៃឈើ និងផលិតក្តារបន្ទះមួយកន្លែង ឋិតនៅឃុំកំពង់ចាម ទៅទីតាំងថ្មី នៅចំណុចភូមិកំពង់ដំរី នៃឃុំបឹងចារ ស្រុកសំបូរ ខេត្តក្រចេះវិញ។ សហគមន៍ព្រៃឡង់ និងមន្ត្រីសង្គមស៊ីវិលចាត់ទុក ការអនុញ្ញាតឱ្យប្រមូលឈើខ្នាតធំ របស់ក្រសួងកសិកម្មនេះ គឺជាការចូលដៃជើងជាមួយឈ្មួញទុច្ចរិតបំផ្លាញធនធានធម្មជាតិ និងជាឧក្រិដ្ឋកម្មព្រៃឈើ៕
