(ភ្នំពេញ) ៖ បុរសបុរសម្នាក់បានស្លាប់ភ្លាមៗនៅនឹងកន្លែងកើតហេតុ ដោយគេសង្ស័យស្រវឹងស្រា បើកបរម៉ូតូស្កូពីមួយគ្រឿង ក្នុងល្បឿនយ៉ាងលឿន ជ្រុលទៅបុករបាំងថ្មពុះចែកទ្រូងផ្លូវពេញទំហឹង បបណ្ដាលឱ្យបោកក្បាលនឹងបង្គោលភ្លើងបំភ្លឺដងផ្លូវ បែកក្បាលស្លាប់នៅនឹងកន្លែង កាលពីវេលាម៉ោង៣ និង៤០នាទីទៀបភ្លឺ ថ្ងៃទី២០ ខែមេសា ឆ្នាំ២០១៩ ត្រង់ចំណុចខាងជើងស្នងការដ្ឋាននគរបាលរាជធានីភ្នំពេញ ប្រមាណ៥០០ម៉ែត្រ តាមបណ្ដោយផ្លូវ៥៩៨ ស្ថិតក្នុងសង្កាត់ច្រាំងចំរះទី១ ខណ្ឌឫស្សីកែវ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ គេឃើញបុរសរងគ្រោះខាងលើ បើកបរម៉ូតូមួយគ្រឿង ម៉ាកហុងដាស្កូពី ស៊េរី០១៩ ពណ៌ស ពាក់ស្លាកលេខ ភ្នំពេញ1HO-8788 ដោយធ្វើដំណើរតាមបណ្ដោយផ្លូវ៥៩៨ ក្នុងទិសដៅពីត្បូងទៅជើង និងក្នុងល្បឿនយ៉ាងលឿន ថែមទាំងមានដឹកស្រាបៀរ Heinekenដប ចំនួន២កេះ ដាក់នៅខាងមុនទៀតផង។
លុះមកដល់ចំណុចកើតហេតុ សង្ស័យបុរសរងគ្រោះទំនងជាស្រវឹងស្រា ក៏ស្រាប់តែបើកម៉ូតូរេចង្កូតទៅខាងឆ្វេងបុកនឹងរបាំងថ្មពុះចែកទ្រូងផ្លូវពេញទំហឹង បណ្ដាលឲ្យម៉ូតូរងខូចខាតបែកកាបាំងខាងមុខ។ រីឯបុរសរងគ្រោះដែលជាអ្នកបើកបរម៉ូតូខាងលើ បានបោកក្បាលជាមួយនឹងបង្គោលភ្លើងបំភ្លឺ ដែលនៅចំកណ្ដាលទ្រូងផ្លូវ បែកក្បាលដាច់ខ្យល់ស្លាប់ភ្លាមៗនៅនឹងកន្លែងកើតហេតុ។
ប្រភពដដែលបន្តថា ភ្លាមនោះ ក៏ស្រាប់លេចមុខជនឆ្លៀតឱកាសចំនួន២នាក់ ជិះម៉ូតូមួយគ្រឿង មិនចាំម៉ាក មកឈប់នៅកន្លែងកើតហេតុ រួចក៏ចុះទៅលូកហោប៉ៅខោសពបុរសរងគ្រោះលួចយកកាបូបលុយ និងទូរស័ព្ទដៃចំនួន១គ្រឿងបានសម្រេច ហើយក៏ឡើងជិះម៉ូតូគេចចេញពីកន្លែងកើតហេតុបាត់ស្រមោលទៅ។ ក្រោយមក មានសមត្ថកិច្ចមូលដ្ឋានបានចុះមកដល់កន្លែងកើតហេតុ និងបានធ្វើការឆែកឆេរលើខ្លួនជនរងគ្រោះ ដើម្បីរកអត្តសញ្ញាណ។
ក្នុងនោះដែរ សមត្ថកិច្ចបានឆែកឆេររកឃើញ ទូរស័ព្ទដៃមួយគ្រឿងទៀតដែលនៅសល់ ម៉ាកសាំសុង ប៉ុន្តែទូរស័ព្ទនោះ ជាប់លេខសម្ងាត់។
ក្រោយពេលកើតហេតុ សមត្ថកិច្ចមូលដ្ឋាន ក៏បានទាក់ទងហៅសមត្ថកិច្ចជំនាញឱ្យចុះមកធ្វើការវាស់វែងយកម៉ូតូរបស់ជនរងគ្រោះខាងលើទៅរក្សាទុកនៅអធិការដ្ឋាននគរបាលខណ្ឌឫស្សីកែវ រង់ចាំចាត់ការបន្ត។ ចំណែកឯសពជនរងគ្រោះ ដោយមិនអាចធ្វើការទាក់ទងស្វែងរកសាច់ញាតិឃើញ សមត្ថកិច្ចក៏បានយកសពទៅតម្កល់នៅវត្តទួល រង់ចាំរង់ចាំបងប្អូនមកទទួលយកទៅធ្វើបុណ្យ៕
