(ខេត្តព្រះសីហនុ)៖ រថយន្ត៤គ្រឿង បានបុកគ្នានៅផ្លូវជាតិលេខ៤ ចន្លោះគីឡូម៉ែត្រលេខ១០៧-១០៨ នៅចំណុចផ្លូវកោង ស្ថិតក្នុងភូមិស្ទឹងច្រាល ឃុំអូរបាក់រទេះ ស្រុកកំពង់សីលា ខេត្តព្រះសីហនុ នៅវេលាម៉ោង៦នឹង៤៥នាទីព្រឹក ថ្ងៃទី២៤ ខែកុម្ភៈ ឆ្នាំ២០១៩ សំណាងក្នុងករណីខាងលើមិនបានបណ្តាលឱ្យមនុស្សរងរបួសឡើយ។
មន្ត្រីនគរបាលខេត្តព្រះសីហនុបានឱ្យដឹងថា រថយន្តមួយគ្រឿងម៉ាក Higlander ពណ៌ ទឹកប្រាក់ ពាក់ស្លាកលេខភ្នំពេញ2AI-1958 បើកបរដោយឈ្មោះ មុយ ឆាយ ភេទប្រុស អាយុ៥៦ឆ្នាំ មានទីលំនៅភូមិ១ សង្កាត់បឹងកេងកងទី៣ ខណ្ឌចំការមន ភ្នំពេញ ទិទិសដៅពីភ្នំពេញឆ្ពោះទៅខេត្តព្រះសីហនុ។ លុះមកដល់ចំណុចខាងលើ បានបុកជាមួយរថយន្តម៉ាក HINO ពណ៌ត្រួយចេក ពាក់ស្លាកលេខ ព្រះសីហនុ 3A-8995 ( អ្នកបើកបររត់គេចបាត់) ក្នុងទិសដៅស្របគ្នា ភ្លាមនោះរថយន្ត Higlander បានរ៉េចង្កូតមកឆ្វេងបុកជាមួយរថយន្តម៉ាកFuso ពណ៌ ត្រួយចេក លាយខៀវ ពាក់ស្លាកលេខភ្នំពេញ 3A-5956 (ផ្ទុកកុងតឺន័រក្រុមហ៊ុនអ៊ុយញ៉ុង) បើកបរដោយឈ្មោះ យ៉ូង បារាំង ភេទប្រុស អាយុ២៦ឆ្នាំ ទីលំនៅ ភូមិព្រែកត្នោត ឃុំព្រែកត្នោត ស្រុកទឹកឈូ ខេត្តកំពត ទិសដៅផ្ទុយគ្នា រីឯរថយន្ត Hino ក៏បានជ្រុលចង្កូតមកឆ្វេងដូចគ្នាបុកជាមួយរថយន្ត sienna (ទឹសដៅផ្ទុយគ្នា) ពណ៌សស ពាក់ស្លាកលេខភ្នំពេញ 2AJ-0511 បើកបរដោយឈ្មោះ ឈិត សុភី ភេទប្រុស អាយុ៤០ឆ្នាំមានទីលំនៅ ភមិត្រពាំង ឃុំស្រែអំបិល ស្រុកស្រែអំបិល ខេត្តកោះកុង។
មន្ត្រីនគរបាលដដែលបន្តថា គ្រោះថ្នាក់ចរាចរណ៍នេះ មិនបណ្តាលមនុស្សរបួសឡើយ តែបានខូចខាតរថយន្ត ៤គ្រឿង ៕
