(ភ្នំពេញ៖) យុវជន២នាក់ជិះម៉ូតូ១គ្រឿងម៉ាកហុងដា BEAT ពណ៌ ខៀវលាយស បានធ្វើសកម្មភាពឆក់ទូរស័ព្ទស្រ្តីជន បរទេសម្នាក់ អាយុប្រហែល៤០ឆ្នាំ កំពុងធ្វើដំណើរតាមរុឺម៉កកង់បី ខណៈប្រជាពលរដ្ឋបានជួយស្រែកឆោឡោ សមត្ថកិច្ចដែលមានកំពុងល្វាតក្បែរនោះបានមកជួយអន្តរាគមន៍ឃាត់ខ្លួនបានម្នាក់ ហើយម្នាក់ទៀតបានរត់គេចខ្លួនបាត់។ហេតុការណ៍នេះបានកើតឡើងនៅវេលាម៉ោង០៩ និង១០ នាទីយប់ ថ្ងៃសៅរ៍ ទី២៦ ខែមករា ឆ្នាំ២០១៩ ស្ថិតនៅចំណុចមុខផ្ទះលេខ៥៣ ផ្លូវ ១៨៤ កែង ៦៣ ភូមិ១២ សង្កាត់ ផ្សារថ្មី៣ ខណ្ឌដូនពេញ ។
តាមរយៈការសួរចម្លើយ ជនសង្ស័យខាងលើគឺជាមុខសញ្ញាឆក់សកម្ម ជាប្រចាំថ្ងៃ តាមបណ្តាខណ្ឌ ក្នុងរាជធានីភ្នំពេញ និងបានធ្វើសកម្មភាពឆក់បានសម្រេចច្រើនដងទៅលើជនបរទេសគ្រប់ជាតិសាសន៍ ។ ជាមួយគ្នានោះអធិការដ្ឋានខណ្ឌដូនពេញបានបញ្ជាឱ្យបន្តការស្រាវជ្រាវជ្រាវ និងតាមចាប់ខ្លួនបក្ខពួកម្នាក់ដែលបានរត់គេចខ្លួននោះ បាននៅខណ្ឌចំការមន នៅវេលាម៉ោង 23 និង30នាទីយប់ ថ្ងៃដដែល ។
សមត្ថកិច្ចនគរបាលខណ្ឌដូនពេញបានឱ្យដឹងថា
ជនសង្ស័យ២នាក់នោះ៖ ទី១- ឈ្មោះ ពៅ ដារ៉ាវិត ភេទ ប្រុស អាយុ១៦ឆ្នាំ មុខរបរ សិស្សវិទ្យាល័យព្រះសុីសុវត្ថិ ស្នាក់នៅផ្ទះលេខគ្មានលេខ ភូមិបឹងប្រលឹត សង្កាត់ព្រែកប្រា ខណ្ឌ ច្បាអំពៅ ។ ទី២-ឈ្មោះ យឹម សំណាង ភេទ ប្រុស អាយុ១៧ឆ្នាំ មុខរបរសិស្ស ស្នាក់នៅផ្ទះលេខ១២ ផ្លូវសុធារស សង្កាត់ទន្លេរបាសាក់ ខណ្ឌចំកាមន។ ដោយរឹបអូសបានវត្តុតាង ម៉ូតូ១គ្រឿងម៉ាកហុងដា Beat ពណ៌ខៀវលាយស ពាក់ស្លាកលេខភំ្នពេញ 1HG 7595 ។
សមត្ថកិច្ចនគរបាលខណ្ឌដូនពេញបានបញ្ជាក់ឱ្យដឹងថាបានវិធានការជំនាញសួរចម្លើយរកបក្ខពួកនៅសេសសល់ និងប្រវត្តិសកម្មភាពកន្លងមក ព្រមទាំងកសាងសំណុំរឿងបញ្ជូនទៅសាលាដំបូងរាជធានីដើម្បីចាត់ការតាមច្បាប់ ៕
