ខេត្តកំពង់ឆ្នាំង៖ លោក ប្រាក់ សោភណ្ឌ ប្រធានសាខាកាកបាទក្រហមខេត្តកំពង់ឆ្នាំង នៅព្រឹកថ្ងៃទី 04 ខែមករា ឆ្នាំ 2019 នេះបានដឹកនាំក្រុមការងារ ចុះសួរសុខទុក្ខប្រជាពលរដ្ឋរស់នៅក្នុងភូមិកោះតាម៉ូវ ឃុំកំពង់ព្រះគគីរ ស្រុកបរិបូណ៌ ដើម្បីសិក្សាគម្រោងធ្វើអណ្តូងលូ ផ្ដល់ជូនប្រជាពលរដ្ឋចំនួន 85 គ្រួសារដែ លបានបំលាស់ទីផ្ទះពីក្នុងទឹកឡើងមករស់នៅលើគោក កំពុងអត់ទឹកប្រើប្រាស់ ។
លោកស្រី អ៊ិត សុខគឿន អនុប្រធានភូមិកោះតាម៉ូវ បានឲ្យដឹងថា៖ ប្រជាពលរដ្ឋសរុបនៅក្នុងភូមិកោះតាម៉ូវមានចំនួន 172គ្រួសារ ក្នុងនោះប្រជាពលរដ្ឋចំនួន 85 គ្រួសារ រស់នៅលើផ្ទះបណ្តែតទឹកបានបំលាស់ទីឡើងមករស់នៅលើគោក តាមផ្លូវលំក្រោយវត្តវត្តកោះតាម៉ូវ ដែលបច្ចុប្បន្នកំពុងខ្វះខាតទឹកប្រើប្រាស់ ដោយស្នើសុំដល់សាខាកាកបាទក្រហមខេត្តកំពង់ឆ្នាំង ក៏ដូចជាសប្បុរសជននានា មេត្តាជួយផ្ដល់អណ្តូងទឹកមួយចំនួនជូនពួកគាត់ ដែលអាចប្រឈមនឹងការខ្វះខាតទឹកប្រើប្រាស់នៅក្នុងរដូវប្រាំងក្នុងពេ លខាងមុខនេះ ។
លោក ឈួន រ៉ា អនុប្រធានសហគមន៍នេសាទកំពង់ព្រះគគីរ បាននិយាយឲ្យដឹងថា៖ ការធ្វើអណ្ដូ ងលូ កន្លងមកក្នុងអណ្តូងលូមួយ ដែលមានជម្រៅ៥ម៉ែត្រនៅក្នុងតំបន់នេះអាចធានាទឹកប្រើប្រាស់បាននៅក្នុងរដូវប្រាំង ដោយបូកនិងការចាក់សាបជុំវិញអណ្តូងនេះផង ត្រូវចំណាយប្រាក់ប្រមាណ 400 ដុល្លា ស្មើនិង 160 ម៉ឺនរៀល ទើបកសាងបាន ។
ចំពោះសំណូមពរសុំអណ្តូងទឹក របស់ប្រជាពលរដ្ឋនៅក្នុងភូមិកោះតាម៉ូវ នេះ លោកប្រាក់ សោភណ្ឌ ប្រធានសាខាកាកបាទក្រហមខេត្តកំពង់ឆ្នាំង បានលើកឡើងថា៖ លោកចុះមកក្នុងពេលនេះគ្រាន់តែមកសិក្សាអំពីការធ្វើអណ្ដូងបុក ឬអណ្តូងលូ តែប៉ុណ្ណោះ ដើម្បីលើកគម្រោងស្នើសុំទៅថ្នាក់ជាតិសំរេច ។ តែបើតាមការសិក្សាជាមួយអាជ្ញាធរភូមិ និងសហគមន៍ ប្រជាពលរដ្ឋ១០ខ្នងផ្ទះអាចនឹងទទួលបានអណ្តូងលូមួយគ្រឿង ដែលក្នុងអណ្តូងនិយមួយៗត្រូវចំណាយថវិការកសាងអស់ប្រមាណ 400 ដុល្លា តែរឿងនេះលោកមិនទាន់ហ៊ានសន្យាថា នឹងជួយកសាងអណ្តូងលូបានចំនួនប៉ុន្មានអណ្តូងទេ ដោយរង់ចាំធ្វើការសិក្សាសុំយោបល់ពីថ្នាក់លើសិន ទើបផ្តល់ដំណឹងជូនពេលក្រោយ ។
ដោយឡែក នៅព្រឹកថ្ងៃទី 4 ខែមករា នេះដែរ លោកប្រធានសាខាកាកបាទក្រហមខេត្តកំពង់ឆ្នាំងបាននាំយកអំណោយរបស់សាខាកាកបាទក្រហមខេត្ត ចែកជូនគ្រួសារក្រីក្រនៅក្នុងភូមិកោះតាម៉ូវចំនួន 3 គ្រួសារ គឺ៖ 1 គ្រួសារ លោក ហុក ចាន់ណាន , 2 គ្រួសារ លោក អ៊ុំ ឌឿន និង 3 លោកយាយ ហុក សោ ចាស់ជរាគ្មានទីពឹង ដោយនៅក្នុងមួយគ្រួសារៗ ទទួលបានវអង្ករ 30 គីឡូ មី១កេះ និងឃីតមួយកញ្ចប់មានអាវមួយ មុងមួយ និងភួយមួយ ដើម្បីជួយដោះស្រាយការខ្វះខាតនៅក្នុងបន្ទុកគ្រួសារ ។
ប្រជាពលរដ្ឋរស់នៅក្នុងភូមិកោះតាម៉ូវ សូមថ្លែងអំណរគុណយ៉ាងជ្រាលជ្រៅដល់សាខាកាកបាទក្រហមខេត្តកំពង់ឆ្នាំង និងសង្ឃឹមជឿជាក់ថាក្នុងពេលខាងមុខនេះ សាខាកាកបាទក្រហមខេត្តកំពង់ឆ្នាំងជាពិសេសសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានសាខាកាកបាទក្រហមកម្ពុជា នឹងជួយកសាងអណ្ដូងលូមួយចំនួន ជូនពួកគាត់ទាំង៨៥គ្រួសារ ដែលកំពុងជួបការលំបាកជាមិនខានឡើយ ៕ រឹទ្ធិ ជ័យ
