ខេត្តកំពង់ឆ្នាំង៖ ប្រជាពលរដ្ឋចំនួនជាង៣ម៉ឺននាក់នៅយប់ថ្ងៃទី៣១ ខែធ្នូ ឆ្នាំ២០១៨ បាននាំក្រុមគ្រួសារ មិត្តភ័ក្រ មកចូលរួមឆ្លងឆ្នាំសកល២០១៨ ឈានចូលឆ្នាំ២០១៩ យ៉ាងស ប្បាយរីករាយ នៅតាមសួនច្បារនានាកណ្តាលទីក្រុងកំពង់ឆ្នាំង។
ក្រោយការដឹងនាំដ៏ឈ្លាសវៃប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្រោមគោលនយោបាយឈ្នះ-ឈ្នះ បានធ្វើអោយប្រទេសជាតិមានសុខសន្តិភាពពេញបរិបូណ៌ មានការអភិវឌ្ឍនន៍រីកចំរើនលើគ្រប់វិស័យ ពីទីក្រុងរហូតដល់ជនបទ និងបានធ្វើអោយប្រជាពលរដ្ឋមានជីវ ភាពធូរធារ និងមានឱកាសនាំក្រុមគ្រួសារដើរកំសាន្តនៅក្នុងឱកាសបុណ្យទានផ្សេងៗ ។
ជាក់ស្តែងនៅក្នុងខេត្តកំពង់ឆ្នាំង អាជ្ញាធរខេត្ត បានអភិវឌ្ឍន៍ទឹកដីក្រុងកំពង់ឆ្នាំងអោយមានសោភ័ណភាពស្រស់ត្រកាលនៅក្នុងយប់ឆ្លងឆ្នាំ២០១៨ ឈានចូលឆ្នាំ២០១៩ លោក ឈាង វណ្ណៈ អនុប្រធានមន្ទីរព៍ត៌មានខេត្តកំពង់ឆ្នាំង បានអោយដឹងថា៖ មានប្រជាពលរដ្ឋមកពីគ្រប់មូលដ្ឋាន បានចូលរួមឆ្លងឆ្នាំប្រមាណជាង៣ម៉ឺននាក់ ដោយបានជួបជុំគ្នាហូបចុក បាញ់កាំជ្រូចលេងកំសាន្តនៅតាមសួនច្បារនានាចំកណ្តាលទីក្រុងកំពង់ឆ្នាំង។
ដោយឡែកនៅក្នុងសួនកុមារមុខសាលាខេត្តកំពង់ឆ្នាំងអាជ្ញាធរខេត្ត បានរៀបចំវង់តន្ត្រីជូនប្រជាពលរដ្ឋច្រៀងរាំលេងកំសាន្តយ៉ាងសប្បាយរីករាយផងដែរនៅក្នុងយប់ថ្ងៃឆ្លងឆ្នាំសកលនេះ ដែលអាចបញ្ជាក់បានថា ប្រទេសជាតិមានសុខសន្តិភាព គឺប្រជាពលរដ្ឋពិតជាមានសុភមង្គល មានសេចក្តីសុខ មានភាពសំបូរសប្បាយរុងរឿងយ៉ាងពិតប្រាកដ៕ រឹទ្ធិ ជ័យ
