(ខេត្តតាកែវ) ៖ ម៉ូតូ ២គ្រឿងបើកបញ្ច្រាស់ទិសហើយបានបុកគ្នាពេញទំហឹង បណ្ដាលឱ្យបុរសម្នាក់ស្លាប់ភ្លាមៗនៅនឹងកន្លែងកើតហេតុ និងមនុស្ស២នាក់ទៀតបានរងរបួសស្រាលនៅក្នុងករណីគ្រោះថ្នាក់ចរាចរណ៍ម៉ូតូបុកជាមួយនឹងម៉ូតូ។ ហេតុការណ៍នេះបានកើតឡើងនៅវេលាម៉ោង៦ និង២០នាទីព្រឹកថ្ងៃទី២៤ ខែមីនា ស្ថិតនៅលើខ្នងព្រែកធំ ភូមិកណ្ដឹងតូច ឃុំកណ្ដឹង ស្រុកបាទីខេត្តតាកែវ។

សមត្ថកិច្ចបានឱ្យដឹងថា ម៉ូតូពីរគ្រឿងបើកបរបញ្ច្រាសទិដគ្នាពីជើងទៅត្បូងបានបុកគ្នា។ ករណីនេះបង្កឡើងដោយម៉ូតូម៉ាកហុងដាឌ្រីម សេ១២៥ ស៊េរីឆ្នាំ ២០២១ ពណ៌ខ្មៅ ពាក់ស្លាកលេខភ្នំពេញ1IP-0404 បើកមកពីទិសខាងជើងទៅត្បូងដោយឈ្មោះឈាង ស៊ីណា ភេទប្រុស អាយុ៤០ឆ្នាំ មុខរបរកសិករ មានទីលំនៅភូមិព្រៃផ្ដៅ ឃុំព្រៃផ្ដៅស្រុកព្រៃកប្បាស ខេត្តតាកែវ បណ្ដាលឱ្យស្លាប់នៅនឹងកន្លែងកើតហេតុ។

ចំណែកភាគីម្ខាងទៀត ម៉ូតូម៉ាកហុងដាឌ្រីម សេ១២៥ ស៊េរីឆ្នាំ២០១៨ ពណ៌ខ្មៅ ពាក់ស្លាកលេខតាកែវ1P-5444 បើកមកពីទិសខាងត្បូងទៅទិសខាងជើងដោយឈ្មោះសុឹម កែវ ភេទប្រុស អាយុ២៨ឆ្នាំ មុខរបរកម្មករ មានទីលំនៅភូមិមឿងប្រចិន ឃុំចំប៉ី ស្រុកបាទី ខេត្តតាកែវ បណ្ដាលឲ្យរងរបួសស្រាល ហើយអ្នករួមដំណើរជាមួយឈ្មោះសែម សុភាព ភេទស្រី អាយុ ២៦ឆ្នាំ មុខរបរកម្មការិនី មានទីលំនៅភូមិមឿនប្រចិន ឃុំចំប៉ី ស្រុកបាទី ខេត្តតាកែវ រងរបួសស្រាលផងដែរ។

សមត្ថកិច្ចបានបញ្ជាក់ឱ្យដឹងទៀតថា មូលហេតុមកពីម៉ូតូហុងដាឌ្រីម ស៊េរីឆ្នាំ២០២១បើកបរក្នុងល្បឿនលឿន។ ក្រោយកើតហេតុកម្លាំងសមត្ថកិច្ចជំនាញចរាចរណ៍ជើងគោកបានចុះដល់កន្លែងកើតហេតុដើម្បីធ្វើការត្រួតពិនិត្យ និងវាស់វែង ហើយបានយកវត្ថុតាងបង្កទៅរក្សាទុកនៅអធិការដ្ឋានដើម្បីរង់ចាំការដោះស្រាយតាមនីតិវិធី៕