• បង្ក្រាបមេខ្លោងកែច្នៃ និងជួញដូរគ្រឿងញៀន ២នាក់ រឹបអូសថ្នាំញៀនជិត៦០គីឡូក្រាម នៅភ្នំពេញ
    ដោយ admin  ថ្ងៃទី 30 April, 2020  ម៉ោង 08:55 | សន្តិសុខ​សង្គម

    (ភ្នំពេញ)៖ នៅរសៀលថ្ងៃទី២៩ ខែមេសា ឆ្នាំ២០២០នេះ កម្លាំងជំនាញមន្ទីរប្រឆាំងគ្រឿងញៀន នៃអគ្គស្នងការរដ្ឋាននគរបាលជាតិ បានបើកប្រតិបត្តិការបង្ក្រាបករណីកែឆ្នៃ ជួញដូរសារធាតុញៀន ដោយខុសច្បាប់ ឃាត់ខ្លួនមេខ្លោងជាជនបរទេស២នាក់ រឹបអូសថ្នាំញៀនជិត៦០គីឡូក្រាម។

    ប្រតិបត្តិការបង្ក្រាបករណីគ្រឿងញៀនេះ ធ្វើឡើងនៅវេលាម៉ោង១៤ និង៤០នាទី ថ្ងៃទី២៩ ខែមេសា ឆ្នាំ២០២០ នៅចំណុចផ្ទះគ្មានលេខ ភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ កម្លាំងជំនាញ «ក១១» របស់មន្ទីរប្រឆាំងបទល្មើសគ្រឿងញៀន ដឹកនាំដោយលោកឧត្ដមសេនិយ៍ត្រី ស៊ី ផល្លា នាយករងមន្ទីរ និងមានការសំរបសំរួលពីលោកព្រះរាជអជ្ញារង សាយ ណូរ៉ា បានដំណើរការបង្ក្រាបករណីកែឆ្នៃ ជួញដូរគ្រឿងញៀន។

    ការបង្ក្រាបនេះអនុវត្តតាមបញ្ជាដឹកនាំរបស់ នាយឧត្ដមសេនីយ៍ សន្តិបណ្ឌិត អគ្គស្នងការនគរបាលជាតិ ព្រមទាំងតាមការបញ្ជាដឹកនាំដោយផ្ទាល់ របស់នាយឧត្ដមសេនិយ៍ ម៉ក់ ជីតូ អគ្គស្នងការរងនគរបាលជាតិ និងឧត្ដមសេនិយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀន។

    លទ្ធផលនៃការបង្ក្រាបករណីកែច្នៃគ្រឿងញៀនដ៏ធំនេះ កម្លាំងជំនាញបានឃាត់ខ្លួនជនសង្ស័យ២នាក់ មានឈ្មោះ LEE KWAN FUK ភេទប្រុស ជនជាតិចិន (ហុងកុង) កាន់លិខិតឆ្លង ដែនលេខ KJ06288571 និងឈ្មោះ THET THET HLAING ភេទស្រី ជនជាតិមីយ៉ាន់ម៉ា កាន់លិខិតឆ្លងដែនលេខ MA 030746។

    សម្រាប់វត្ថុតាងដែលដកហូតបានរួមមាន៖ សារធាតុញៀនអិចស្តាស៊ីប្រមាណ ១៤០,០០០គ្រាប់ មានទម្ងន់ជាង៥៧គីឡូក្រាម និងម៉ាស៊ីនកែឆ្នៃ២គ្រឿង។ ជនសង្ស័យ និងវត្ថុតាងត្រូវបានបញ្ជូន មកមន្ទីរប្រឆាំងគ្រឿងញៀន ដើម្បីបន្តការស៊ើបអង្កេតតាមចាប់មេខ្លោង និងអ្នកពាក់ព័ន្ធ៕

    Loading...
    www.tenbestproduct.com | www.10bestproduct.com | www.hqreview.com | www.bestselectedproducts.com
    loading...
    shares